سوودانی بەرەو ئەنقەرە بەڕێکەوت

بە گوێرەی راگەیێندراوی نووسینگەی سەرۆکوەزیرانی عێراق، رۆژی پێنجشەممە 8ی ئایاری 2025، محەممەد شیاع سوودانی، سەرۆکوەزیرانی عێراق بە سەردانێکی فەرمی بەرەو ئەنقەرە-ی پایتەختی تورکیا بەڕێکەوت بۆ بەشداریکردن لە کۆبوونەوەکانی ئەنجوومەنی باڵای عێراقی- تورکی بۆ هاوکاری ستراتیژی.

 

22ی نیسانی پار رەجەب تەیب ئەرۆغان سەردانی عێراق و هەرێمی کوردستانی کرد و  تورکیا و عێراق 26 رێککەوتن و یاداشتنامەی لێکتێگەیشتنیان واژۆکرد؛ شەشیان تایبەت بوون بە بوارەکانی ئابووری، بازرگانی، وەبەرهێنان، کشتوکاڵ و ئاو.

 

بەپێی داتاکانی ئەنجوومەنی هەناردەکارانی تورکیا، پار هەناردەی تورکیا بۆ عێراق و هەرێمی کوردستان بەراورد بە پێرار 9.8٪ زیادیکردووە و بە بەهای 10 ملیار و 698 ملیۆن و 863 هەزار دۆلار کاڵا هەناردە کراوە.

 

خالید ئاجار، سەرۆکی ئەنجوومەنی کاری تورکیا - عێراق لە دەستەی پەیوەندییە ئابورییەکانی دەرەوە 29ی کانوونی دووەمی 2025 رایگەیاند، پار ئاڵوگۆڕی بازرگانیی نێوان تورکیا و عێراق 20 ملیار دۆلار بووە. ئامانجیانە ئەم ساڵ قەبارەکە بگەیێننە 30 ملیار دۆلار.