لە قودس/ئۆرشەلیم تەقە کرا و لانیکەم پێنج کەس کوژراون

 

رۆژی دووشەممە، 08-09-2025، فریاگوزاریی ئیسرائیل بڵاویکردەوە، لە رووداوێکی تەقەکردن لە ئۆرشەلیم/قودس چەند کەسێک برینداربوون و ژمارەی کوژراوانیش گەیشتە پێنج کەس.

 

سەرەتا دەزگەکە رایگەیاندبوو، 15 کەس برینداربوون.

 

رووداوەکە لە نزیک رێگەیەکی خێرا بوو و لەکاتی چوونی خەڵک بوو بۆ سەر کار. ئەوکات رێگەکە قەرەباڵخ بوو و ئۆتۆمبێلێکی زۆری لێبوو.

 

بەگوێرەی زانیارییە بڵاوکراوەکان، یەکێک لە کوژراوەکان پیاوێکە لە پەنجاکانی تەمەنی دایە و دوو کەسی دیکەش تەمەنیان نزیکەی 30 ساڵە.

 

پۆلیسی ئیسرائیل لەبارەی ئەو کەسانەی تەقەیان کردووە زانیاریی زۆری بڵاونەکردووەتەوە، بەڵام گوتی دوو تەقەکەریان کوشتووە. واتە کۆی گشتیی کوژراوەکان بە تەقەکارانەوە، تاوەکو ئێستا 7 کەسن.

 

بەگوێرەی پۆلیس، دوو تەقەکەرەکە بە ئۆتۆمبێلێک چوونەتە چواڕیانی رامۆت، لەوێ تەقەیان لە وێستگەیەکی پاس کردووە کە خەڵکی تێدابووە. دواتر، پۆلیسێک و سڤیلێک کە چەکی پێبووە، تەقەیان لەو دوو کەسە کردووە.

 

پۆلیسی ئیسرائیل بڵاویکردەوە: "هێزێکی گەورەی پۆلیس گەیشتوونەتە شوێنەکە، یەکەی پووچەڵکردنەوەی بۆمب لەوە دڵنیا دەبنەوە ناوچەکە ئارام و سەلامەتە، تیمەکانی دادپزیشکیش بەڵگە کۆدەکەنەوە."

 

نووسینگەی بنیامین نەتەنیاهوو، سەرۆکوەزیرانی ئیسرائیل رایگەیاند، ئێستا سەرۆکوەزیران لە کۆبوونەوەدایە و دۆخەکە هەڵدەسەنگێنن.

 

وەزارەتی دەرەوەی ئەڵمانیا راگەیاند: "ئەڵمانیا بەو هێرشە ترسنۆکانەیە شۆك بووە."