ئیسرائیل لە دروستکردنی تۆڕی نوێی رێگەی کەشتی و شەمەندەفەر لە هیندستانەوە بۆ ئەوروپا بەشداردەبێت

 

پلانەکە، پڕۆژەیەکی گەورەیە و ئامانجی پەرەپێدانی گەشەی ئابووری و پێکەوەکارکردنی سیاسییە، لەلایەن جۆ بایدن، سەرۆکی ئەمریکا و هاوپەیمانەکانی لە هیندستان، لە لووتکەی ساڵانەی کۆمەڵەی 20 ئابوورییە باڵاکانی جیهان راگەیێندرا. 

 

بە گوتەی سەرکردەکان، پڕۆژەکە یارمەتیدەر دەبێت بۆ گەشەکردنی بازرگانی، گواستنەوەی وزە و باشترکردنی پەیوەندیی دیجیتاڵی.

 

هەریەکە لە: هیندستان، سعودیە، ئیمارات، ئوردن، ئیسرائیل و یەکێتیی ئەوروپا لە پڕۆژەکەدا بەشداردەبن.

 

لە پەیامێکی ڤیدیۆییدا کە شەوی شەممە (9-9-2023) بڵاویکردووەتەوە، بنیامین نەتەنیاهوو، سەرۆکوەزیرانی ئیسرائیل دەڵێت، پڕۆژەکە هێڵی ئاسن، راکێشانی بۆریی هایدرۆجین و هێڵی کارەبا لەنێوان وڵاتان لەخۆدەگرێت.

 

نەتەنیاهوو گوتی "وڵاتەکەمان، ئیسرائیل دەبێتە خاڵێکی چوارڕیانێکی ناوەندی لەم رێڕەوە ئابوورییەدا."

 

 

ئەمشەو، خۆشحاڵم کە هەواڵێکی نایابتان پێ دەڵێم. ئیسرائیل لە چەقی پڕۆژەیەکی نێودەوڵەتی بێوێنەدایە. پڕۆژەیەک کە ژێرخانی نێوان ئاسیا و ئەوروپا بەیەکەوە دەبەستێتەوە. ئەم پەیوەندییە دیدگەیەکی لەمێژینە بەدیدێنێت، کە رووی رۆژهەڵاتی نێوەڕاست دەگۆڕێت، رووی ئیسرائیل دەگۆڕێت و کاریگەریی لەسەر هەموو جیهان دەبێت. ئەم روانگەیە لە هیندستانەوە دەستپێدەکات، بە ئیمارات، سعودیە، ئوردن، ئیسرائیلدا تێدەپەڕێت و دەگاتە ئەوروپا.