ئیسرائیل: رێڕەوێکی سەلامەتی ئاسمانیمان لە رۆژئاوای ئێرانەوە تاوەکو تاران دروستکردووە

 

 

رۆژی شەممە، 14ـی حوزەیرانی 2025، ئیفی دێفرین، گوتەبێژی سوپای ئیسرائیل لە راگەیێندراوێکدا گوتی: "ئێمە سەربەستیی جووڵەی ئاسمانیمان لە رۆژئاوای ئێرانەوە تاوەکو دەگاتە تاران فەراهەم کردووە."

 

گوتەبێژەکەی سوپا دەڵێت، "تاران چی دیکە پارێزراو نییە" و گوتیشی، سوپا شەوی رابردوو "هێرشێکی بەرفراوانی بە بەشداریی زیاتر لە 70 فڕۆکەی جەنگی ئەنجام دا و ئامانجەکانی لە تاران کردە ئامانج."

 

ئیفی دێفرین جەختی لە بەردەوامی هێرشەکان کردەوە و گوتی، ئێستا فڕۆکە جەنگییەکانیان خەریکی بۆردوومانکردنی ژمارەیەک پێگەی نێو ئێرانن. 

 

بەرەبەیانی رۆژی هەینی، ئیسرائیل ئۆپەراسیۆنێکی سەربازی بۆ سەر ئێران ئەنجامدا و ژمارەیەک بەرپرسی باڵای سەربازی و زانای ئەتۆمی کوشت. لە بەرامبەردا ئێران بە 150 مووشەک و 100 درۆن هێرشی کردە سەر ئیسرائیل. 

 

هێرشە مووشەکییەکەی سوپای پاسداران بووە هۆی برینداربوونی لانیکەم 60 کەس کە 7 کەسیان سەربازن. 

 

شەوی رابردووش باڵیۆزی ئێران لە نەتەوە یەکگرتووەکان گوتی، هێرشەکەی ئیسرائیل بووەتە هۆی ئەوەی 78 کەس بکوژرێن و زیاتر لە 320 کەسی دیکەش بریندار بن

 

لەوکاتەوە هێرشەکانیان بۆ سەر یەکتری بەردەوامە.