ئیسرائیل هێرشەکانی بۆ سەر بەیرووت چڕ دەکاتەوە

 

سوپای ئیسرائیل لە راگەیێندراوێکی کورتدا ئاماژەی بەوە کرد کە هێزەکانیان "ئێستا خەریکی لێدانی ئامانجەکانی رێکخراوی تیرۆریستیی حیزبوڵڵان لە بەیرووت." پێش دەستپێکردنی بۆردوومانەکە، گوتەبێژێکی سەربازی هۆشداری دایە دانیشتووانی گەڕەکەکانی باشووری بەیرووت، کە بە پێگەی بەهێزی حیزبوڵڵا دادەندرێن، تاوەکو ناوچەکە چۆڵ بکەن.

 

ئاژانسی هەواڵی نیشتمانیی لوبنان بڵاویکردەوە کە دوو گەڕەکی جیاواز لەو ناوچەیە کراونەتە ئامانج، بەڵام هێشتا قەبارەی زیانەکان و ژمارەی قوربانییەکان دیار نییە.

 

 

لە ناوچە سنوورییەکانی باشووری لوبنانیش، هێرشێکی ئاسمانیی ئیسرائیل بۆ سەر خانوویەک لە شارۆچکەی "غەندورییە" بووە هۆی کوژرانی لانیکەم کەسێک و برینداربوونی دووانی دیکە. 

میدیای فەرمیی لوبنان بڵاویکردەوە، هێزەکانی ئیسرائیل "ئۆپەراسیۆنێکی بەرفراوانی کێوماڵکردن"یان لە دەوروبەری شارۆچکەی خیام دەستپێکردووە.

 

لە بەرامبەردا، حیزبوڵڵا رایگەیاند کە چەکدارەکانیان لە شەش گوندی جیاوازی باشووری وڵاتەکە رووبەڕووی هێزەکانی ئیسرائیل بوونەتەوە. 

 

گرووپەکە ئاماژەی بەوەشکرد، چەندین مووشەکیان ئاراستەی ناوچە سنوورییەکان کردووە، ئەمەش وای کردووە لە باکووری ئیسرائیل زەنگی ئاگادارکردنەوە لێ بدرێت.

 

 

میشێل عیسا، باڵیۆزی ئەمریکا لە لوبنان، رۆژی هەینی پشتگیریی وڵاتەکەی بۆ دەسپێشخەرییەکی جۆزێف عەون، سەرۆککۆماری لوبنان بۆ راگەیاندنی ئاگربەست دەربڕی و بە رۆژنامەڤانانی گوت: "کێشەکان بێ گفتوگۆ چارەسەر نابن." بەڵام باڵیۆزی ئەمریکا ئاماژەی بەوەش کرد کە پێدەچێت ئیسرائیل بڕیاری دابێت هێرشەکانی رانەگرێ.

 

لوبنان لە 2ی ئاداری ئەم ساڵەوە بە فەرمی چووەتە نێو جەنگی رۆژهەڵاتی نێوەڕاست، ئەوەش دوای ئەوەی حیزبوڵڵا لەو رۆژەدا دەستی بە هێرشکردنە سەر ئیسرائیل کرد.

 

بەگوێرەی ئامارەکانی وەزارەتی تەندروستیی لوبنان، تاوەکو ئێستا زیاتر لە 1,000 کەس لەو وڵاتە کوژراون و زیاتر لە ملیۆنێک کەسیش ئاوارە بوون. هاوکات سوپای ئیسرائیل کوژرانی دوو سەربازی خۆی لە باشووری لوبنان پشتڕاست کردووەتەوە.