رووحانی بۆ کازمی: سیاسەتی ئەمریکا لە بەرژەوەندی عێراق نییە

 

حەسەن رووحانی، سەرۆککۆماری ئێران بە تەلەفۆن قسەی لەگەڵ مستەفا کازمی، سەرۆکوەزیرانی عێراق کردووە و پێیگوتووە "ئەمریکا لە عێراق خەریکی یارییەکی ئاڵۆزە."

 

ئاژانسی تەسنیمی ئێران دوێنێ سێشەممە 21-07-2021 باسی نێوەڕۆکی پەیوەندییە تەلەفۆنییەکەی بڵاوکردووەتەوە و رایگەیاندووە، کە حەسەن رووحانی، سەرۆککۆماری ئێران پەیوەندی بە مستەفا کازمی، سەرۆکوەزیرانی عێراقەوە کردووە و پێی راگەیاندووە "کە ئەم رۆژانە ئەمریکا سەرقاڵی یارییەکی ئاڵۆزە لە عێراق". 

 

ئەو ئاژانسە ئاشکراشیکردووە، لەو پەیوەندییە تەلەفۆنییەدا رووحانی بە کازمی گوتووە، ئەمریکا سیاسەتێکی دووفاق لە عێراق پەیڕەو دەکات و چالاکییەکانی لەسەر سنووری نێوان ئەو وڵاتە و سووریادا دژ بە بەرژەوەندییەکانی وڵاتانی ناوچەکەیە.

 

رووحانی هۆشداری داوەتە کازمی لەو یارییانەی کە ئەمریکا لە عێراق و ناوچەکە دەیانکات و پێی گوتووە "ئەم رۆژانە ئەمریکا یارییەکی ئاڵۆز لەبارەی شەڕی دژ بە تیرۆر دەکات و لە عێراق و وڵاتانی عەرەبی سیاسەتی دووفاقە و ئەو کارانەی کە ئەمریکا لەسەر سنووری نێوان عێراق  و سووریادا ئەنجامیان دەدات دژ بە بەرژوەندی وڵاتانی ناوچەکەن."

 

هەر بەپێی میدیای ئێران، وەزیرانی دەرەوەی عێراق و ئێران بە تەلەفۆن قسەیانکردووە و تاووتوێی پەیوەندییەکانی نێوان هەردوو وڵاتیان کردووە.

 

پەیوەندییە تەلەفۆنییەکەی فوئاد حسێن و جەواد زەریف لەکاتێکدایە دوێنێ سێشەممە، فوئاد حسێن و شاندێکی وەزارەتی دەرەوەی عێراق گەیشتنە واشنتنی پایتەختی ئەمریکا وەک ئامادەکارییەک بۆ سەردانەکەی مستەفا کازمی، سەرۆکوەزیرانی عێراق بۆ ئەو وڵاتە کە بڕیارە لە رۆژی 27ی ئەم مانگە ئەنجام بدرێت.