غەززەییەکان لەوپەڕی برسێتیدا شەڕ بۆ مانەوەیان دەکەن

 

زیاتر لە دوو ملیۆن غەززەیی، لەوپەڕی برسێتیدا شەڕ بۆ مانەوە لە ژیان دەکەن.

 

عەلیا حەلاوە، دانیشتووی نوسێراتە و دەڵێت، "کەرتی غەززە رووبەڕووی برسێتی بووەتەوە. نە شیر، نە خواردن، نە ئارد و نە هیچ پێداویستییەکی سەرەکیی ژیان نییە."

 

ئاژانسی نەتەوە یەکگرتووەکان بۆ پەنابەرانی فەلەستینی دەڵێت، رۆژ بە رۆژ راپۆرتی نائومێدکەریان لەبارەی برسێتی لە کەرتەکە پێدەگات. بەدەستخستنی خواردن نزیک بووەتەوە لە مەحاڵ، نرخی خۆراکیش بەشێوەیەکی بەرچاو بەرزبووەتەوە.

 

منداڵ، گەنج و پیر، ژن و پیاو لە نۆرەی وەرگرتنی ژەمێک خواردنن لەو کەمپە کە دەکەوێتە نێوەڕاستی غەززە. شەکەتی کاریگەرییەکانی جەنگ و برسیەتیی لە رادەبەدەریان پێوە دیارە.

 

بەراورد بە پێش دەستپێکردنی جەنگەکە، نرخی ئارد 3 هەزار هێندەی پێشوو بەرزبووەتەوە، هەندێک لە پێداویستییە سەرەکییەکانی دیکەش نرخەکانیان 40 هێندەی پێشوو بەرزبووەتەوە. 

 

 

عەواد سەتاری، پیاوێکی ئاوارەی خەڵکی رەفەحە و دەڵێت، "خێزانێک بە ئەستەم گاڵۆنێک ئاوی بۆ ماڵەوە دەستدەکەوێت، خێزانێکی 10 کەسیش کە دوو گاڵۆنیان هەبێت، بەشی سێ رۆژیان ناکات."

 

بە گوێرەی ئەو پێوانانەی لەلایەن نەتەوە یەکگرتووەکانەوە بەکاردێن، لە 2.2 ملیۆن غەززەیی 96٪ییان برسین و نزیکەی 30٪یشیان لە برسیەتی تووندان.

 

ئێستا تادێت نرخی خۆراک لە کەرتەکە بەرزدەبێتەوە، پێش جەنگ، کیلۆیەک شەکر بە دۆلارێک بوو، ئێستا 60 هێندەیە. هەروەها، نرخی کیلۆیەک ئاردیش لە 2.5 دۆلارەوە بووەتە 70 دۆلار.