لە هێرشەکانی ئیسرائیلدا بۆسەر باشووری لوبنان 10 کەس کوژران

 

 

لە هێرشێکدا بۆسەر گوندی دێر قانوون نەهر، 6 کەس کوژران کە دووانیان کارمەندی فریاگوزاری بوون و کچێکی بچووکی سووریایشی تێدابوو.

 

لە هێرشێکی دیکەشدا بۆسەر شارۆچکەی حەناوەی، 4 کارمەندی دیکەی فریاگوزاری کە سەر بە رێکخراوێکی نزیک لە حیزبوڵڵان، کوژران.

 

سوپای ئیسرائیلیش رایگەیاند کە لە نزیک سنوور، دوو چەکداریان کردوونەتە ئامانج و کوشتوویانن؛ هەروەها هۆشداریی دایە دانیشتووانی گوندی بورج رەحال کە ماڵەکانیان چۆڵ بکەن.

 

 

محەممەد رەعد، سەرۆکی فراکسیۆنی حیزبوڵڵا لە پەرلەمانی لوبنان رایگەیاند: "ئیسرائیل لە گۆڕەپانی شەڕدا بێ هیوا بووە، بۆیە تووڕەیی خۆی بەسەر گوندەکان و خەڵکی سڤیلدا دەڕێژێ؛" هەروەها باسی لەوە کرد، بەردەوام دەبن لە هێرشکردنە سەر سەربازانی ئیسرائیل و بە تووندیش دژی هەر جۆرە دانوستاندنێکی راستەوخۆن لەگەڵ ئیسرائیل.

 

لەلایەکی دیکەوە، ئەمریکا سزای بەسەر 9 کەسدا سەپاند کە پەیوەندییان بە حیزبوڵڵاوە هەیە، بە تۆمەتی ئەوەی رێگرن لە پرۆسەی ئاشتی لە لوبنان. دوو لەو کەسانە ئەفسەری سوپای لوبنانن.

 

شەڕی ئیسرائیل و حیزبوڵڵا لە 2ـی ئادار دەستیپێکرد، دوای ئەوەی حیزبوڵڵا لە تۆڵەی کوژرانی رێبەری باڵای کۆماری ئیسلامیی ئێران لە هێرشێکی ئەمریکا و ئیسرائیلدا، هێرشی کردە سەر ئیسرائیل.

 

سەرەڕای ئەوەی لە 17ـی نیسانەوە ئاگربەست راگەیێندراوە و هەفتەی رابردووش بۆ 45 رۆژی دیکە درێژکرایەوە، بەڵام هێرشەکانی هەردوولا بەردەوامن. ئێستا سوپای ئیسرائیل تاوەکو قووڵایی 10 کیلۆمەتر چووەتە نێو خاکی لوبنانەوە.

 

بەپێی ئامارەکان، تاوەکو ئێستا لە لوبنان لانیکەم 3 هەزار و 111 کەس کوژراون، لە بەرامبەریشدا سوپای ئیسرائیل کوژرانی 22 سەربازی خۆی راگەیاندووە.