بەر لە ئاگربەست ئێران هێرشی کرد و 9 ئیسرائیلی کوژران

 

 

خزمەتگوزاریی فریاکەوتنی ماگن داڤید ئادۆم لە پۆستێکدا لە تۆڕی کۆمەڵایەتیی ئێکس رایگەیاند، 3 کەس لە شوێنی هێرشەکە لە باشووری شاری بیئر سەبع گیانیان لەدەستداوە و دواتریش 6 لە بریندارەکانی هێرشەکە گیانیان لەدەستداوە.

 

بەگوێرەی دەزگاکە، نزیکەی کەسی دیکەش بریندار بوون، دوو کەس برینەکانیان مامناوەندە و ئەوانی دیکەش برینەکانیان سووکە.

 

بەگوێرەی راگەیێندراوەکانی سوپای ئیسرائیل، لە بەرەبەیانەوە بۆ ماوەی نزیکەی دوو کاژێر زەنگی ئاگادارکردنەوە لە سەرانسەری ئیسرائیل لێدرا، لە کاتێکدا ئێران 6 شەپۆلی مووشەکیی ئاراستە کردبوو.

 

نزیک کاژێر 8:00ی بەیانی سوپای ئیسرائیل رایگەیاند، خەڵک دەتوانن لە پەناگەکان بێنە دەرەوە.

 

زیانەکانی هێرشەکانی ئێران بۆ سەر ئیسرائیل بە تەواوی نەزانران، بەڵام دەگوترێ لانیکەم 50 مووشەک کەوتوونەتە خوارەوە و بەر لە هێرشەکانی ئەم بەیانییەش 24 کەس لە ئیسرائیل کوژراون.

 

بەگوێرەی سوپای ئیسرائیل، سیستمی بەرگریی ئاسمانیی ئەو وڵاتە زیاتر لە 500 مووشەک و نزیکەی 1000 فڕۆکەی بێفڕۆکەوانی ئێرانی خستووەتە خوارەوە.

 

شەوی رابردوو دۆناڵد ترەمپ، سەرۆکی ئەمریکا لە پۆستێکی سۆسیال تروسدا رایگەیاند، ئێران و ئیسرائیل لەسەر ئاگربەستێکی قۆناخبەندی رێککەوتوون.

 

بەگوێرەی ترەمپ، ئێران دەبێت بە شێوەیەکی تاکلایەنە هەموو ئۆپەراسیۆنەکانی لە کاژێر 04:00ی بەرەبەیانی (کاژێر 07:00ی بەیانی بە کاتی هەولێر) ئەمڕۆ سێشەممە رابگرێت و ئیسرائیلیش دوای 12 کاژێر هەمان هەنگاو بنێت.