فەلەستینییەکان پلانی ترەمپ بۆ چۆڵکردنی غەززە رەتدەکەنەوە

 

 

رۆژی یەکشەممە، 26-01-2025، دۆناڵد ترەمپ، سەرۆکی ئەمریکا لە کاتی چوونی لە ویلایەتی نیڤاداوە بۆ فلۆریدا لەبارەی هەندێک پێشهات بۆ رۆژنەماڤانان قسەی کرد و رایگەیاند، رۆژی شەممە بە تەلەفۆن لەگەڵ شا عەبدوڵڵای دووەم، شای ئوردن باسی ئەو پلانەی کردووە کە ئوردن و میسر و وڵاتانی دیکەی ئەندام لە کۆمکاری عەرەبی، پەنابەری زیاتری خەڵکی غەززە وەربگرن و بڕیارە رۆژی یەکشەممەش هەمان بابەت لەگەڵ عەبدولفەتاح سیسی، سەرۆکی میسر باس بکات. 

 

ترەمپ لەنێو فڕۆکەی (ئێیەر فۆرس وەن)ـەوە گوتی: "حەز دەکەم ئەوان خەڵکی زیاتر وەربگرن؛ میسر خەڵکی زیاتر وەربگرێت. ئێمە باسی نزیکەی ملیۆنێک و 500 هەزار کەس دەکەین بۆ ئەوەی شوێنەکە بە تەواوی پاک بکەینەوە و پێیان بڵێین کۆتایی هاتووە".  

 

بزووتنەوەی حەماس کە 15 مانگ لەگەڵ ئیسرائیل لە جەنگدا بوو و ئێستا ئاگربەستیان راگەیاندووە، بڵاویکردەوە: "خەڵکی ئێمە، لەدژی خراپترین تاوانەکانی جینۆساید لەمێژووی نوێدا، خۆڕاگر بوون، کە ئیسرائیلی داگیرکار کردی. ئێمە بە هەموو جۆرێک هەر پلانێکی دیپۆرتکردن و راگواستنی خەڵکی فەلەستین لەنێو خاکی خۆیان رەتدەکەینەوە."

 

بزووتنەوە فەلەستینییەکە هەروەها داوای لە ئیدارەی نوێی ئەمریکا کرد، خۆیان لەو جۆرە پێشنیازانە بەدوور بگرن، "کە لەگەڵ پلانەکانی ئیسرائیل هاوشانە و لە دژی ماف و خواستی ئازادی گەلی ئێمەیە."

 

حەماس داواشیکرد، ئەمریکا کاربکات بۆ ئەوەی رێگە بە فەلەستینییەکان بدرێت ئازادیی خۆیان بەدەستبهێنن و دەوڵەتی سەربەخۆی خۆیان هەبێت، "کە قودس پایتەختەکەی بێت."

 

حەماس داوای لە وڵاتانی عەرەب، بەتایبەت میسر و ئوردن کرد، "هەڵوێستی تووندی خۆیان لە رەتکردنەوەی ئەو پلانە دووپات بکەنەوە و پشتگیریی لە گەلی فەلەستین بکەن."

 

47ـەمین سەرۆکی ئەمریکا ستایشی هەوڵەکانی ئوردنی کرد بەوەی ژمارەیەکی زۆر لە پەنابەری فەلەستینی وەرگرتووە و بە شای ئوردنیشی گوتووە: "زۆر حەز دەکەم ژمارەیەکی زۆرتریش وەربگریت، لەبەرئەوەی من ئێستا تەماشای کەرتی غەززە دەکەم و دەبینم وێرانە؛ بەڕاستی وێرانەیە."

 

دۆناڵد ترەمپ لەبارەی شوێنی نیشتەجێبوونی دانیشتووانی غەززە دەڵێت، "دەبێت شتێک بکرێت، بەڵام ئێستا (غەززە) ناوچەیەکی وێرانەیە و بەشێکی زۆری داروپەردووە و خەڵک بەردەوام دەمرن؛ بۆیە حەز دەکەم لەگەڵ هەندێک لە وڵاتانی عەرەبی هاوئاهەنگی بکەم و لە هەندێ شوێنی جیاواز یەکەی نیشتەجێبوون دروست بکرێت و رەنگە لەو شوێنانەدا لە ئاشتیدا بژین".