هەڵبژاردنی ئیسرائیل؛ دوو سەرۆکوەزیرانی پێشوو دژی نەتەنیاهوو یەکیانگرتووە

 

رۆژی یەکشەممە، 26-04-2026 بێنێت لە گوتارێکی تەلەڤزیۆنیی هاوبەشدا لەگەڵ لاپید رایگەیاند، ئەوان بەیەکەوە پارتی (بێیەهاد)ـیان دامەزراندووە، پارتەکەش بەرەو سەرکەوتنێکی گەورە و دەستپێکردنی قۆناخێکی نوێ بۆ وڵاتەکەیان هەنگاو دەنێت. بێنێت گوتیشی: "خۆشحاڵم ئەمشەو لەگەڵ یائیر لاپیدی هاوڕێم، نیشتمانیترین هەنگاومان بۆ وڵاتەکەمان نا."

 

لاپید ئاماژەی بەوە کرد، بێنێت سیاسەتڤانێکی باڵی راستڕۆیە، بەڵام مرۆڤێکی راستگۆیە و متمانە لە نێوانیاندا هەیە. لاپید کە پێشتر خۆشی سەرۆکوەزیران بووە، لە ئێکس نووسی: "ئەم هەنگاوە دەبێتە هۆی یەکخستنی بەرەی چاکسازی، بۆ ئەوەی هەموو هەوڵەکان بۆ گەیاندنی ئیسرائیل بە چاکسازیی پێویست کۆبکرێنەوە."

 

نەفتالی بێنێت بەڵێنی دا، ئەگەر هەڵبژێردرێت، لیژنەیەکی لێکۆڵینەوەی نیشتمانی لەبارەی شکستەکانی رۆژی 7ـی تشرینی یەکەمی 2023 پێکبهێنێت، کە حکومەتەکەی نەتەنیاهوو تاوەکو ئێستا رەتیدەکاتەوە ئەو کارە بکات. هەردوو سەرکردەکە رەخنەی تووندیان لە شێوازی بەڕێوەبردنی شەڕەکان لەلایەن نەتەنیاهوو هەیە و لاپید ئاگربەستی دوو هەفتەیی ئەم دواییەی لەگەڵ ئێرانی بە "کارەساتێکی سیاسی" وەسفکرد.

 

بێنێتی تەمەن 54 ساڵ، کوڕی کۆچبەرێکی ئەمریکی و سەرمایەدارێکی پێشووی بواری تەکنەلۆژیایە، لە ساڵی 2005 کۆمپانیاکەی بە 145 ملیۆن دۆلار فرۆشت. بێنێت پێشتر ئەفسەری هێزە تایبەتەکان بووە و یەکێک بووە لە راوێژکارەکانی نەتەنیاهوو، بەڵام دواتر بووە نەیاری سەرسەختی رێبازە سیاسییەکەی. بێنێت و لاپید پێشتریش لە حوزەیرانی 2021 حکومەتێکی هاوپەیمانییان پێکهێنا، بەڵام لە کۆتایی 2022 حکومەتەکەیان بە ئیدارەی ئێستای نەتەنیاهوو گۆڕدرا.

 

راپرسییەکان ئاماژە بەوە دەکەن، بێنێت گونجاوترین بەربژێرە بۆ شکستپێهێنانی نەتەنیاهوو لە هەڵبژاردنەکانی مانگی تشرینی یەکەمدا. بێنێت داوای لە گادی ئایزنکۆت، سەرۆکی پارتی (یاشار) کردووە بچێتە پاڵ لیستە هاوبەشەکەیان.

 

هاوبەشە نوێیەکەی بێنێت، یائیر لاپیدی تەمەن 62 ساڵ، کوڕی تۆمی لاپیدی رۆژنامەڤان و وەزیری کۆچکردووە. لاپید رۆژنامەڤانێکی ناسراوی تەلەڤزیۆنی بووە و لە ساڵی 2012 چووەتە نێو سیاسەت و پارتی (یێش ئاتید)ـی دامەزراندووە، کە دواتر بووە دووەم گەورەترین هێزی سیاسیی ئیسرائیل. لاپید جگە لەو ماوە کورتەی کە سەرۆکوەزیران بووە، وەک سەرۆکی ئۆپۆزسیۆن کاریکردووە.

 

بنیامین نەتەنیاهوو پلانی هەیە لە هەڵبژاردنە گشتییەکاندا کە دەبێت پێش کۆتایی مانگی تشرینی یەکەم بکرێت، سەرۆکایەتیی لیستی پارتەکەی بکات. نەتەنیاهوو تەمەنی 76 ساڵە و سەرۆکی پارتی راستڕۆی (لیکۆد)ـە، بە زیاتر لە 18 ساڵ کارکردن لە پۆستی سەرۆکوەزیران، بە خاوەنی درێژترین ماوەی مانەوە لەو پۆستە لە مێژووی ئیسرائیل دادەندرێت.