کەسوکاری بارمتە ئیسرائیلییەکان داوا لە ترەمپ دەکەن گوشار لە نەتەنیاهوو بکات کۆتایی بە شەڕی غەززە بهێنێت

 

 

ئودی گۆرین، ئامۆزای تاڵ حەیمی کە یەکێکە لە بارمتەکان، گوتی: "سەلماندوومانە کاتێک ئەمریکا و ئیسرائیل پێکەوە کاردەکەن، هیچ شتێک ناتوانێت رێگریمان لێبکات، گرنگ نییە دوژمن چەندە سەخت بێت." گوتیشی، "سەرۆک ترەمپ، تکایە پێداگربە و 50 بارمتەکە بگەڕێنەرەوە."

 

لەکاتێکدا ئاگربەستێکی هەستیار لەنێوان ئیسرائیل و ئێراندا هەیە، ترەمپ رایگەیاندووە کە "پێشکەوتنی گەورە" لە گفتوگۆکانی ئاگربەستی غەززەدا بەدەستهاتووە، بێ ئەوەی وردەکاریی زیاتر بخاتەڕوو.

 

ئایناڤ زەنگاوکەر، دایکی ماتان زەنگاوکەری بارمتە، داواکاریی زیاتری ئاراستەی سەرۆکی ئەمریکا کرد و گوتی: "بەرێز سەرۆک، جەنابت، هەروەک چۆن بڕیارتدا کۆتایی بە شەڕی ئێران بهێنیت... ئێستا کۆتایی بە شەڕی غەززە بهێنە."

 

لە هێرشەکەی رۆژی 7ی ئۆکتۆبەری 2023دا، نزیکەی 1200 کەس لە ئیسرائیل کوژران و 251 کەسیشیان بە بارمتە گیران.

 

زۆربەیان لە رێککەوتنەکانی ئاگربەستدا ئازادکران، بەڵام 50 کەسیان هێشتا لە غەززەن و وا بڕوا دەکرێت کەمتر لە نیوەیان لە ژیاندا مابن.

 

بەگوێرەی وەزارەتی تەندروستیی غەززە، شەڕەکە بووەتە هۆی کوژرانی زیاتر لە 56 هەزار فەلەستینی کە زیاتر لە نیوەیان ژن و منداڵن.

 

نەتەوە یەکگرتووەکان دەڵێت، گەمارۆ و هێرشە سەربازییەکانی ئیسرائیل دانیشتووانی ناوچەکەیان گەیاندووەتە لێواری برسێتی.