وزەی ئەتۆمی ئێران: توانای دروستکردنی بۆمبی ئەتۆممان هەیە، بەڵام پلانمان نییە دروستی بکەین

 

 

محەممەد ئیسلامی، سەرۆکی رێکخراوی وزەی ئەتۆمیی ئێران ئەمڕۆ دووشەممە بە میدیاکانی راگەیاند، ئێران توانای تەکنیکیی دروستکردنی بۆمبی ئەتۆمی هەیە، بەڵام لە پلانیاندا نییە ئەو جۆرە چەکە دروستبکەن.

 

سەرۆکی رێکخراوی وزەی ئەتۆمیی ئێران بە ئاماژەدان بە هۆشدارییەکانی ئیسرائیل و ئەمریکا لەبارەی پێشگرتن لە دەستڕاگەیشتنی ئێران بە چەکی ئەتۆمی دەڵێت، لەوانەیە بتوانن تووشی سەرئێشەیان بکەن، بەڵام ناتوانن پێشیان پێ بگرن، چونکە دەستیان بە رێوشوێنەکانی راگەیشتووە.

 

پێشتریش کەمال خەرازی، راوێژکاری رێبەری کۆماری ئیسلامیی ئێران بۆ کاروباری نێودەوڵەتی رایگەیاندبوو، توانای دروستکردنی چەکی ئەتۆمییان هەیە، بەڵام بڕیاریان نەداوە ئەو کارە بکەن.

 

سەرۆکی رێکخراوی وزەی ئەتۆمیی ئێران داوا لە وڵاتانی بەشدار لە رێککەوتنی ئەتۆمی دەکات، یەکلایی بکەنەوە دەیانەوێت رێککەوتنی ئەتۆمی کارا بکرێتەوە یان نا و دەڵێت، ئەگەر نایانەوێت با چیدیکە کات بەفیڕۆ نەچێت.

 

لە لایەکی دیکەوە گوتەبێژی وەزارەتی دەرەوەی ئێران ئەمڕۆ رایگەیاند، لە رۆژانی رابردوودا پەیامی جیددی لەبارەی رێککەوتنی ئەتۆمی ئاڵوگۆڕ کراون و لەوانەیە لە داهاتوویەکی نزیکدا بە ئەنجام بگەن و گەڕێکی دیکەی دانوستاندن دەستپێبکات.