ئێران: کۆگاکانی نەوتی تاران و ئەلبورز کرانە ئامانج و دابینکردنی سووتەمەنی بەردەوامە

 

 

کۆمپانیاکە لە راگەیێندراوێکدا بڵاویکردەوە، ئێوارەی رۆژی شەممە، لە ئەنجامی ئەوەی بە "هێرشی دوژمنی زایۆنی-ئەمریکی" ناوی بردووە بۆ سەر ژێرخانی وزەی وڵاتەکە، ژمارەیەک لە کۆگاکانی نەوت لە پارێزگاکانی تاران و ئەلبورز کرانە ئامانجی هێرشی مووشەکی.

 

بەپێی زانیارییەکانی کۆمپانیا ئێرانییەکە، ئێستا تیمەکانی ئاگرکوژێنەوە لە شوێنی رووداوەکانن و سەرقاڵی کۆنترۆڵکردن و کوژاندنەوەی ئەو ئاگرانەن، کە بەهۆی هێرشەکانەوە کەوتوونەتەوە.

 

لەبارەی ئەگەری دروستبوونی قەیرانی سووتەمەنی، کۆمپانیای نیشتمانیی پاڵاوتن و دابەشکردنی بەرهەمە نەوتییەکان دەڵێت: "پێشتر رێوشوێنی پێویست بۆ کەمترین ئاستی کۆگاکردنی بەرهەمەکان گیرابووەبەر."

 

هەروەها دڵنیایی دەداتە دانیشتووانی ئەو دوو پارێزگایە و رایدەگەیێنێت: "ئێستا دابینکردنی سووتەمەنی بۆ پارێزگاکانی تاران و ئەلبورز بەشێوەیەکی ئاسایی و بەردەوام لە سەرچاوەکانی دیکەوە لە جێبەجێکردندایە و پچڕانی تێدا نییە."

 

لە دوای هێرشی ئەمریکا و ئیسرائیل بۆ سەر ئێران لە 28ی شوبات، لە دوێنێوە ئیسرائیل دەستیکردووە بە بە ئامانجکردنی ژێرخانی ئابووریی ئێران، چەند ویستگەی سووتەمەنی و فڕۆکەخانەی میهرئابادی بۆردوومان کردووە.