مانگی سووری ئێران: تاوەکو ئێستا 9,670 شوێنی سڤیل کراونەتە ئامانج

 

 

ئەمڕۆ یەکشەممە، 8ی ئاداری 2026، پیرحوسێن کولیوەند، سەرۆکی کۆمەڵەی مانگی سووری ئێران سەردانی کۆگەیەکی نەوتی لە باکووری رۆژئاوای تاران کرد کە بەرەبەیانی ئەمڕۆ بووە ئامانجی بۆردوومانی چڕی ئەمریکا و ئیسرائیل و زیانێکی زۆری پێگەیشت.

 

پیرحوسێن کولیوەند دەڵێت: "یەکێک لە کۆگە سووتەمەنیەکانی تاران شەوی رابردوو هێرشیکرایە سەر و کرایە ئامانج، ئاگری گرتووە و تا ئێستاش دەسووتێت، جگە لەوەش، چەند ئامانجێک لە باشوور و رۆژهەڵاتی تارانیش هێرشیان کرایە سەر و بە تەواوی لەناوچوون. هەروەها ئۆتۆمبێلە بارهەڵگرەکانی سووتەمەنی لە ناوچەکە ئاگریان گرت و لەناوچوون."

 

کولیوەند، ئەمریکا و ئیسرائیلی بەوە تۆمەتبار کرد شوێن و ناوچە سڤیلەکان دەکەنە ئامانج و دەڵێت: "سەرەڕای ئەوەی دوژمن بانگەشەی ئەوە دەکات تەنیا ناوچە سەربازییەکان دەکاتە ئامانج، بەڵام درۆ دەکات. تاوەکو ئێستا زیاتر لە نۆ هەزار و 670 ناوچە و شوێنی سڤیل کراونەتە ئامانج، لەوانە 7 هەزار و 943 یەکەی نیشتەجێبوون، هەزار و 617 یەکەی بازرگانی، 32 ناوەندی تەندروستی لەوانەش نەخۆشخانە و دەرمانخانەکان، 65 قوتابخانە کە بەتەواوی خاپوور بوون، هەروەها 12 لقی مانگی سوور لەخۆدەگرێت."

 

بەڵام ئەدمیراڵ براد کووپەر، فەرماندەی فەرماندەیی ناوەندی سوپای ئەمریکا (سێنتکۆم) ئاگادارییەکی بۆ خەڵکی ئێران راگەیاند: "رژێمی ئێران شوێنە قەرەباڵخەکان بۆ ئۆپەراسیۆنەکانی بەکاردێنێت.''

 

سەرۆکی کۆمەڵەی مانگی سووری ئێران هەروەها دەڵێت: "لە هێرشەکاندا، حەوت کارمەندی مانگی سوور لەکاتی دابینکردنی فریاگوزاری و رزگارکردنی بریندارەکان راستەوخۆ کرانە ئامانج و برینداربوون. هەروەها 11 کەس لە کەرتی تەندروستی شەهید بوون و 33 کەسی دیکەی سەر بە کەرتی تەندروستی لە کاتی پێشکەشکردنی خزمەتگوزارییەکانیان کرانە ئامانج. ژمارەیەک ئامبولانس و ئۆتۆمبێلی فریاگوزاریی مانگی سووریش راستەوخۆ لەلایەن مووشەکەکانەوە لە کاتی هەوڵەکانی فریاگوزاریدا کرانە ئامانج و بە تەواوی لەناوچوون."

 

پیرحوسێن کولیوەند داوای لە دامەزراوە نێودەوڵەتییەکانی وەکو خاچی سووری نێودەوڵەتی، داواکاری گشتیی دادگەی نێودەوڵەتیی تاوان و ئەنجوومەنی مافی مرۆڤ کرد، بەدواداچوون بۆ پێشێلکارییەکانی ئەمریکا و ئیسرائیل بکەن.

 

لەوبارەیەوە کولیوەند گوتی: "ئەم کارانە پێشێلکارییەکی ئاشکرای مافەکان مرۆڤە. هەموو ئەم پێشێلکاریانەم بە نامەیەکی نووسراو و بە بەڵگەوە بۆ سەرۆکی لیژنەی خاچی سوور و سەرۆکی فیدراسیۆنی خاچی سوور و داواکاری گشتیی دادگەی نێودەوڵەتیی تاوان، ئەنجومەنی مافی مرۆڤ و دامەزراوە نێودەوڵەتییەکانی دیکەم ناردووە بۆ ئەوەی بەدواداچوون بۆ ئەم دۆسیانە بکرێت و ئەم دامەزراوانە رۆڵ بگێرن."

 

جەنگی ئیسرائیل-ئەمریکا و ئێران پێ ناوەتە نۆیەم رۆژەوە کە لە 28ـی شوبات بە هێرشێکی بەرفراوان بۆ سەر ئێران دەستیپێکرد و تاوەکو ئێستا بەردەوامە. 

 

لە بەرامبەردا هێزە چەکدارەکانی ئێرانیش چەندین جار بە درۆن و مووشەک هێرشیان کردووەتە سەر بنکە سەربازییەکانی ئەمریکا لە ناوچەکە و ئیسرائیل.

 

 

 

• یەکەی نیشتەجێبوون: 7,943 یەکە.

 

• یەکەی بازرگانی: 1,617 یەکە.

 

• ناوەندی پەروەردەیی (قوتابخانە): 65 ناوەند.

 

• ناوەندی دەرمان و تەندروستی: 32 ناوەند.

 

• بنکەکانی مانگی سوور: 13 بنکە.

 

 

بەپێی راپۆرتەکە، 28 ئامێری فریاگوزاری تێکشکاون یان زیانیان بەرکەوتووە، لەوانە:

 

• 15 ئۆتۆمبێلی ئۆپەراسیۆن و فریاکەوتن.

 

• 13 ئەمبوڵانسی سەر بە مانگی سوور و فریاکەوتنی خێرا.

 

ئەم راپۆرتەی مانگی سووری ئێرانی لەژێر ناونیشانی "ئاماری تاوانەکانی جەنگی ئەمریکا و رژێمی زایۆنیستی دژی سڤیلەکانی ئێران" بڵاوکراوەتەوە، وەکو ئاماژەیەک بۆ ئەو گرژییە سەربازییانەی لە ناوچەکەدا لە ئارادان.

 

بەپێی راپۆرتەکە، 28 ئامێری فریاگوزاری تێکشکاون یان زیانیان بەرکەوتووە، لەوانە:

 

• 15 ئۆتۆمبێلی ئۆپەراسیۆن و فریاکەوتن.

 

• 13 ئەمبوڵانسی سەر بە مانگی سوور و فریاکەوتنی خێرا.

 

ئەم راپۆرتەی مانگی سووری ئێرانی لەژێر ناونیشانی "ئاماری تاوانەکانی جەنگی ئەمریکا و رژێمی زایۆنیستی دژی سڤیلەکانی ئێران" بڵاوکراوەتەوە، وەکو ئاماژەیەک بۆ ئەو گرژییە سەربازییانەی لە ناوچەکەدا لە ئارادان.