لاریجانی بۆ دەسەڵاتی داد: ئاژاوەگێڕان بە تووندی سزا بدەن

 

عەلی لاریجانی، سکرتێری ئەنجوومەنی باڵای ئاسایشی نیشتمانیی ئێران، ئەمڕۆ یەکشەممە 11-01-2026 بە میدیای فەرمیی وڵاتەکەی راگەیاند: "هەروەک رێبەری باڵای ئێران ئاماژەی پێداوە، بوونی ناڕەزایەتی لە نێوخۆی وڵات لە هەمبەر گرانی و دۆخی دژواری بژێوی رەوایە، بەڵام دەبێت ناڕازی و ئاژاوەگێڕ لێک جیابکرێنەوە و ئێمە رووبەڕووی ئاژاوەگێڕان دەبینەوە."

 

لاریجانی بانگەشەی ئەوەی کرد کە "ئاژاوەگێڕان" خۆیان خزاندووەتە نێو خۆپێشاندانەکان و بە پلان خەڵک دەکوژن و دەسووتێنن. ئەو گوتی: "ئەم کردەوانەیان زۆر لە کردەوەی گرووپە تیرۆریستییەکانی وەکو داعش دەچێت و بەهۆیانەوە ژمارەیەکی زۆر لە هێزە ئەمنییەکان و خەڵکی ئاسایی بوونەتە قوربانی."

 

پێچەوانەی قسەکانی لاریجانی بۆ جیاکردنەوەی ناڕازی و ئاژاوەگێڕ، داواکاری گشتیی ئێران رۆژی شەممە 10-01-2026 هەڵوێستێکی تووندتری نیشاندا و گوتی: "لە روانگەی ئێمەوە ئەوانەی هاتوونەتە سەر شەقامەکان هیچ جیاوازییەکیان نییە، هەموویان دژی دەسەڵاتی ئیسلامی هەستاونەتەوە و موحاربن (دژی خوا شەڕ دەکەن) و سزایان سێدارەیە."

 

لەلایەکی دیکەوە سوپای ئێران لە 14یەمین رۆژی ناڕەزاییەکاندا، لە راگەیێندراوێکی توونددا ئەمریکا و ئیسرائیلی بەوە تۆمەتبار کرد کە لەپشت ئاڵۆزییەکانن و هۆشداری دا: "بە تووندی رووبەڕووی هەر پیلانێک دەبینەوە."

 

سەبارەت بە کاردانەوە نێودەوڵەتییەکانیش، سەرۆکی پەرلەمانی ئەورووپا رۆژی شەممە رایگەیاند، ئاگاداری دۆخەکەن و بۆ رووبەڕووبوونەوەی ئەوانەی هێرشدەکەنە سەر خۆپێشاندەران "پێویستە سوپای پاسداران و هەر هێرشکارێکی دیکە بخەینە لیستی تیرۆرەوە."

 

خۆپێشاندانەکان رۆژی 28-12-2025 بەهۆی گرانی و خراپیی دۆخی بژێوی، بە مانگرتنی کاسبکاران لە تاران دەستیپێکرد و دواتر تەواوی پارێزگاکانی ئێرانی گرتەوە.