قەرارگای خاتمولئەنبیا: هێرشەکەی سەر بەندەری سەلاسەی عومان گوماناوییە

 

شەوی چوارشەممە 11-03-2026، ئیبراهیم زولفەقاری، گوتەبێژی قەرارگای ناوەندیی خاتمولئەنبیای ئێران سەبارەت بە هێرشە درۆنییەکەی سەر بەندەری سەلاسەی عومان رایگەیاند: ''رووداوەکە گوماناوییە و بەدواداچوونی وردی بۆ دەکرێ.''

 

ئیبراهیم زولفەقاری عومانی بە وڵاتی ''دۆست و برا'' ناوبرد و گوتی: ''هێزە چەکدارەکانی ئێران رێز لە ئاسایش و سەروەریی نیشتمانیی عومان دەگرن.''

 

لە درێژەی جەنگی ئیسرائیل- ئەمریکا لەگەڵ ئێران، ئەمڕۆ بە درۆنێک هێرش کرایە سەر بەندەری سەلاسەی عومان و لە وەڵامدا ئەمریکا و ئیسرائیلیش هێرشیان کردە سەر بەندەرعەباسی ئێران.

 

تاوەکو ئێستا بەرپرسانی ئێرانی رەتیدەکەنەوە هێرشەکە لەلایەن هێزە چەکدارەکانی ئەوانەوە کرابێت و دەڵێن، لێکۆڵینەوە لە رووداوەکە دەکەن.

 

لە 28ـی شوباتی 2026ـوە، ئەمریکا و ئیسرائیل دەستیان بە هێرشێکی بەرفراوانی هاوبەش کردووە بۆ سەر ئێران و لە بەرامبەردا سوپای پاسدارانیش چەندین هێرشی درۆنی و مووشەکی کردووەتە سەر بنکە سەربازییەکانی ئەمریکا لە ناوچەکە و ئیسرائیل.