ئەندامێکی شاندەکەی ئێران: ئەمریکا بۆ رێککەوتن نەهاتبوون و وانەیەکی گەورەیان وەرگرت

 

 

ئەمڕۆ یەکشەممە، مەحموود نەبەویان لە لێدوانێکدا سەبارەت بە دانوستاندنەکانی ئیسلامئاباد گوتی: "تیمی دانوستاندنکار بە رەزامەندیی رێبەری باڵا دەستی بە کارەکانی کرد و چووە ناو دانوستاندنەکانەوە. ئێمە هەم لە مەیدان و هەم لە دانوستاندن سوود وەردەگرین بۆ بەرگریکردن لە ماف و بەرژەوەندییە نیشتمانییەکانی گەلی ئێران."

 

نەبەویان جەختی لەوە کردەوە، دانوستاندنەکان دەبێت گوزارشت لە ویستی خەڵک بکەن و گوتی: "پێویستە دانوستاندن لە پشت خەڵک و لە پشت ویستەکانی خەڵکەوە بێت. دڵنیایی تەواو دەدەینە خەڵکی ئازیزمان کە لەم دانوستاندنەدا کە ئێستا ئەنجامدرا، هەر بەو شێوەیە بووە. هەوڵدراوە ئەوەی ویستی گەلی ئازیزی ئێرانە و بەرگریکردنە لە مافەکانیان و خۆڕاگرییە لە بەرامبەر زۆردارییەکانی ئەمریکا و رژێمی زایۆنی، جێبەجێ بکرێت."

 

 

سەبارەت بە ئەنجامی گفتوگۆکان، جێگری سەرۆکی لیژنەی ئاسایشی پەرلەمانی ئێران ئاشکرای کرد: "لەسەر سێ بابەت جیاوازیی تەواو هەبوو، بە هیچ جۆرێک گەلی ئێران نەچووە ژێر باریان. لەم دانوستاندنەشدا دانوستاندنکارەکان هەمان قسەی گەلی ئێرانیان کرد و بە تووندی وەستان."

 

نەبەویان رەخنەی لە هەڵوێستی واشنتن گرت و رایگەیاند: "وا دیارە ئەمریکا بۆ رێککەوتن نەهاتبوو، ئەمریکا هاتبوو تاوەکو تاقیکردنەوەیەک بکات و ببینێت ئایا گەلی ئێران لەسەر هەمان رێبازی خۆڕاگریی خۆی ماوەتەوە یان نا. وانەیەکی گەورەیان لە گەلی ئێران وەرگرت، هەم لە مەیدان، هەم لە شەقام و هەم لە دانوستاندن. ئینشاڵڵا ئێمە لە پشت گەلی ئێرانەوە بە دڵنیاییەوە لە بەرامبەر زۆردارییەکانی دووژمنان دەوەستین و سەرکەوتن بۆ گەلی ئێرانە."

 

ئەم لێدوانانەی مەحموود نەبەویان دوای ئەوە دێن کە رۆژی شەممە 11-4-2026، دانوستاندنێکی چڕی 20 کاژێری لەنێوان شاندەکانی ئێران و ئەمریکا لە ئیسلامئابادی پایتەختی پاکستان بەڕێوەچوو. 

 

دوای کۆبوونەوەکە، دۆناڵد ترەمپ، سەرۆکی ئەمریکا رایگەیاند، دانوستاندنەکان لە پرسی ئەتۆمیدا بێ ئەنجام بوون و فەرمانی بە گەمارۆدانی تەنگەی هورمز داوە. 

 

ئێران داوای قەرەبووی زیانەکانی شەڕ و وەرگرتنی گەرەنتیی ئەمنی دەکات، لە بەرامبەردا ئەمریکا سوورە لەسەر ئەوەی کە تاران دەبێت بە تەواوی دەستبەرداری پرۆگرامە ئەتۆمییەکەی ببێت.