دادپزیشکیی ئێران: ناسنامەی 3375 کوژراوی هێرشەکانی ئەمریکا و ئیسرائیل ناسراونەتەوە

 

رۆژی یەکشەممە، عەباس مەسجدی، سەرۆکی رێکخراوی دادپزیشکیی ئێران لە کۆبوونەوەی ئەنجوومەنی بەڕێوەبەرانی رێکخراوەکەدا رایگەیاند: "لە ماوەی شەڕی رەمەزاندا، تەرمی سێ هەزار و 375 کەس لەلایەن رێکخراوی دادپزیشکیی ئێرانەوە بە رێگەی زانستی و پسپۆڕی ناسنامەیان دیاریکراوە، کە دوو هەزار و 875 کەسیان پیاو و 496 کەسیشیان ژن بوون."

 

سەبارەت بە دابەشبوونی تەمەنی قوربانییەکان، مەسجدی ئاماژەی بەوە کرد، 7 منداڵی خوار تەمەن یەک ساڵ، 255 منداڵی تەمەن 1 بۆ 12 ساڵ و 121 مێردمنداڵی تەمەن 13 بۆ 18 ساڵ لەنێو قوربانییەکاندان.

 

بەپێی گوتەی سەرۆکی دادپزیشکیی ئێران، زۆربەی قوربانییەکان کە 1761 کەسن (52.18%)، لە تەمەنی 19 بۆ 40 ساڵیدان. هەروەها 906 کەس لە تەمەنی 41 بۆ 60 ساڵ و 223 کەسیش لە سەرووی 61 ساڵییەوە بوون.

 

لەنێو کوژراواندا کەسانی بیانیی هەن

 

مەسجدی ئاشکرای کرد، "لەنێو قوربانییەکاندا هاووڵاتیی ئەفغانستان، سووریا، تورکیا، پاکستان، چین، عێراق و لوبنانیش هەن."

 

هەروەها باسی لەوە کرد، زۆرترین ژمارەی قوربانییەکان بەپێی ریزبەندی لە پارێزگاکانی تاران، هورمزگان و ئەسفەهان تۆمارکراون.

 

ئەم ئامارانەی دادپزیشکیی ئێران دوای زنجیرەیەک هێرشی چڕی ئەمریکا و ئیسرائیل دێن بۆ سەر شارە جیاجیاکانی ئێران لە ماوەی زیاتر لە 40 رۆژی جەنگدا. 

 

ئەم جەنگە کە لە ئێران بە "جەنگی رەمەزان" ناسراوە، زیانێکی زۆری گیانی و مادیی لێکەوتووەتەوە. ئێستا ناوچەکە لەژێر سایەی ئاگربەستێکی کاتیی 2 هەفتەییدایە، بەڵام دوای ئەوەی دۆناڵد ترەمپ رایگەیاند، دانوستاندنە ئەتۆمییەکانی پاکستان بێ ئەنجام بوون، فەرمانی بە گەمارۆدانی تەنگەی هورمز داوە و گرژییەکان دووبارە روویان لە هەڵکشان کردووەتەوە.