بەرپرسێکی ئێران: دەستبەسەرداگرتنی باڵیۆزخانەی ئەمریکا هەڵەیەکی گەورە بوو

 

 

لە هەڤپەیڤینێکدا لەگەڵ میدیای ئێران، عەلی ئەکبەر ناتق نووری رایگەیاند، "زۆرێک لە کێشەکان لە هەندێک هەڵەوە سەرچاوەیان گرتووە کە هەر لە سەرەتای شۆڕشی ئیسلامی روویاندا. بۆ نموونە، دەستبەسەرداگرتنی باڵیۆزخانەی ئەمریکا بە پاساوی ئەوەی بارەگایەکە بۆ سیخوڕی، ئەوە هەڵەیەکی گەورە بوو."

 

عەلی ئەکبەر ناتق نووری گوتیشی، "مەگەر باڵیۆزخانەکانی دیکەی جیهان بەشێکیان نییە بۆ هەواڵگری و سیخوڕی؟ ئەوێیان داگیر کرد و ئەمریکاش لە کاردانەوەدا باڵیۆزخانەکەمانی داخست و پارەکانی ئێمەی سڕ کرد."

 

لە وەڵامی پرسیارێکدا سەبارەت بە هەڵسەنگاندنی کاری کۆماری ئیسلامیی ئێران لە چوار دەیەی رابردوودا، ئەو ئەندامەی کۆڕی دیاریکردنی بەرژەوەندییەکانی کۆماری ئیسلامیی ئێران دەڵێ، "هەر لە سەرەتای شۆڕشەوە، ناپێگەیشتوویی و ناشارەزایی لە بەڕێوەبردنی وڵاتدا هەبوو. ئێمە هیچ ئەزموونێکمان لە کاری بەڕێوەبردنی حکومەتدا نەبوو و هەندێک هەڵە هەر لە سەرەتاوە روویاندا."

 

عەلی ئەکبەر ناتق نووری کە پێشووتر خولێک وەزیری ناوخۆ و دوو خولیش پەرلەمانتار بووە، رەخنە لە هێرشی لایەنە تووندڕۆکانی ئێران بۆ سەر باڵیۆزخانەکانی سعودیە و بەریتانیاش دەگرێ و بە هەڵەی گەورە ناوی دەبات و دەڵێت: "ئەم جۆرە کردەوانە بوونەهۆی گوشار و ئاڵنگاری لە سیاسەتی دەرەوەماندا و ئێستاش لەم دۆخەداین".

 

عەلی ئەکبەر ناتق نووری ئاماژە بەوەش دەکات، لەو کاتەوە زنجیرەیەک کێشە و کاردانەوە بەردەوام هەبوون کە لەو بڕیار و هەڵە سەرەتاییانەوە سەرچاوەیان گرتووە.