هێزی ئاسمانیی سوپای پاسداران: رێژەی پێکانی مووشەکەکانمان دوو هێندە زیادیکردووە
رووداو دیجیتاڵ
فەرماندەی هێزی ئاسمانیی سوپای پاسداران دەڵێ، ئاسمان بەڕووی مووشەکە ''زەبەلاحەکان''ـی ئێراندا کراوەیە؛ ئاماژە بەوەش دەکات، رێژەی پێکانی مووشەکەکانیان دوو هێندە زیادی کردووە.
بەرەبەیانی ئەمڕۆ شەممە 14-03-2026، مەجید موسەوی، فەرماندەی هێزی ئاسمانیی سوپای پاسداران پەیامێکی هەڕەشەئامێزی لە ئێکس بڵاوکردەوە و تێیدا هاتووە، لە 48 کاژێری رابردوودا، رێژەی پێکانی مووشەکەکانی ئێران بۆ سەر ئامانجە ئەمریکی و ئیسرائیلییەکان ''دوو هێندە'' زیادیکردووە.
مەجید موسەوی ئەوەشی خستووەتەڕوو، ''ئامێزی ئاسمان بەڕووی مووشەکە زەبەلاحەکانی ئێراندا کراوەتەوە و سزادانی دەستدرێژیکاران بەردەوامە.''
جەنگی ئیسرائیل-ئەمریکا لەگەڵ ئێران پێدەنێتە 15ـیەم رۆژەوە و تاوەکو ئێستا بەردەوامە، ئێران دەڵێ:" بنکەکانی ئەمریکا لە وڵاتانی ناوچەکە دەکرێنە ئامانج، جگە لە بەئامانجکردنی راستەوخۆی ئیسرائیل بە مووشەک.