ئێران کوژرانی دوو فەرماندەی سەربازی دیکەی وڵاتەکەی راگەیاند

 

ئەمڕۆ شەممە، 14ی حوزەیرانی 2025، ناوەندی پەیوەندی و زانیاری سەر بە ئەرکانی گشتیی هێزە چەکدارەکانی ئێران رایگەیاند: "لە ئەنجامی هێرشی رژێمی زایۆنی بۆ سەر وڵاتەکەمان، غوڵام رەزا محرابی و مەهدی رەبانی" کوژران. 

 

غوڵام رەزا محرابی، جێگری سەرۆکی ئەرکانی هێزە چەکدارەکانی ئێران بۆ  کاروباری هەواڵگری و مەهدی رەبانی، جێگری سەرۆکی ئەرکانی هێزە چەکدارەکانی ئێران بۆ ئۆپەراسیۆنە سەربازییەکان بوون.

 

بەرەبەیانیی رۆژی هەینی 13-06-2025، ئیسرائیل هێرشی کردە سەر ژمارەیەک بنکەی سەربازی و ئەتۆمی لە ئێران و رۆژهەڵاتی کوردستان کە لە ئەنجامدا ژمارەیەک فەرماندەی سەربازی و زانای ئەتۆمیی وڵاتەکە کوژران.

 

ئێران لە وەڵامی هێرشەکەدا ئۆپەراسیۆنی ''پەیمان راست 3''ـی  دژی ئیسرائیل راگەیاند و بە مووشەک و درۆن هێرشی کردە سەر وڵاتەکە. 

 

باڵیۆزی ئێران لە نەتەوە یەکگرتووەکان رایگەیاند، هێرشەکەی ئیسرائیل بووەتە هۆی کوژرانی 78 کەس و برینداربوونی زیاتر لە 320 کەسی دیکە کە زۆربەیان هاووڵاتی سیڤیل بوون، لەنێویاندا ژن و منداڵ هەبوون. 

 

بەگوتەی بەرپرسانی ئیسرائیل، هێرشی ئێران بۆ سەر ئەو وڵاتە بووەتە هۆی برینداربوونی لانیکەم 60 کەس و کوژرانی 3 کەس.