کچە کوردێک دوای دەستگیرکردنی لەلایەن پۆلیسی تاران جەڵتە لێی دەدات

 

هێزەکانی پۆلیسی بەرەنگاربوونەوەی پابەندنەبوون بە باڵاپۆشی لە تاران ئێوارەی رۆژی سێشەممە 13/09/2022 لە وێستگەی حەقانیی میترۆی تاران کچێکی کوردی تەمەن 22 ساڵانی خەڵکی سەقزیان بە ناوی ژینا یان مەهسا ئەمینییان دەستبەسەرکرد و دوای کەمتر لە دوو کاژێر لە دەستبەسەرکردنی، جەڵتە لێیدا.

 

سەفا، خاڵی ژینا رۆژی پێنجشەممە 15-9-2022 بە تۆڕی میدیایی رووداوی راگەیاند، ژینا رۆژی دووشەممە لەگەڵ خێزانەکەی بۆ سەردانی خزمەکانیان چوونە تاران و ئێوارەی سێشەممە لەگەڵ براکەی چووەتە دەرەوە، بەڵام دوای دەستبەسەرکردنی، جەڵتە لێیداوە و ئێستا لە کۆمادایە و پزیشکەکان گوتوویانە، هیوایان بە گەڕانەوەی بۆ ژیان نییە.

 

بەگوتەی سەفا، سکاڵایان لەسەر پۆلیس تۆمارکردووە و داواکاریی گشتیی تاران سەرقاڵی لێکۆڵینەوەیە لەو رووداوە.

 

کیاڕەش ئەمینی، برای ژینا کە لەکاتی دەستبەسەرکردنی لەگەڵیدا بووە، بە میدیاکانی راگەیاندووە، لەگەڵ ژینادا ژمارەیەک ژنی دیکەش دەستبەسەرکراون و هێزەکانی پۆلیس پێیان راگەیاندوون کە دەبردرێنە گرتووخانەی کاتیی وەزیرانی تاران و دوای پێدانی کۆمەڵێک رێنوێنێ لەبارەی شێوازی جلوبەرگ و دەرکەوتنیان لە شوێنی گشتی و وەرگرتنی بەڵێننامەی پابەندبوون بە رێنماییەکانی باڵاپۆشی، ئازادیان دەکەن، بەڵام دوای ئەوەی ژنانی دیکە ئازادکراون، ژینا نەهاتووەتەدەرەوە و هێزەکانی پۆلیس پێیان راگەیاندووە، خوشکەکەی جەڵتەی دڵ لێیداوە و بردراوەتە نەخۆشخانەی کەسرا.

 

میدیا فارسی زمانەکان لە زاری چەند کەسێک لەوانەی دەستبەسەرکرابوون بڵاویانکردووەتەوە، لە رێگەی گواستنەوەیان بۆ بنکەی پۆلیس، دەمەقاڵێ لەنێوان پۆلیس و دەستبەسەرکراوان روویداوە و هێزەکانی پۆلیس لەنێو ئۆتۆمبێل لە ژینا ئەمینییان داوە. ئەو کەسانە هەروەها رایانگەیاندووە، دوای تێکچوونی تەندروستیی ژینا، هێزەکانی پۆلیس خێرا فریای نەکەوتوون و درەنگ گواستوویانەتەوە بۆ نەخۆشخانە. 

 

پۆلیسی تاران ئەمڕۆ پێنجشەممە راگەیێندراوێکی لەوبارەوە بڵاوکردەوە و پشتڕاستی دەکاتەوە کە ژینا ئەمینی دوای دەستبەسەرکردن، لە بنکەی پۆلیس تووشی ئەو دۆخە هاتووە و دەڵێت: "دوای ئەوەی بۆ رێنوێنی پێدان بردراوەتە بنکەیەکی پۆلیس، لەوێ لەپڕا جەڵتەی دڵ لێیداوە و دەستبەجێ رەوانەی نەخۆشخانە کراوە".