موحسین رەزایی بۆ ئەمریکا: نەکشێنەوە هیچ بنکەیەکی سەربازیتان پارێزراو نابێ

 

 

شەوی پێنجشەممە 16-01-2026، موحسین رەزایی، ئەندامی ئەنجوومەنی دیاریکردنی بەرژەوەندییەکانی ئێران لە هەڤپەیڤینێکدا هەڕەشەی لە دۆناڵد ترەمپ، سەرۆکی ئەمریکا کرد و رایگەیاند، لە ئەگەری هێرشکردنە سەر ئێران، ئەم جارە هاوشێوەی جەنگی 12 رۆژەی تاران و تەلئەڤیڤ، ''داوا''ـی ئاگربەست قبووڵ ناکەن.

 

موحسین رەزایی ئاماژەی بە هەڕەشەکانی دۆناڵد ترەمپ کرد بۆ پاڵپشتیی خۆپێشاندەرانی ئێران و گوتی، ''دۆخی وڵات هەستیارە و دەبێ هۆشیار بین. ترەمپ گوتوویەتی [بۆ لێدان لە ئێران] پەنجەی لەسەر پەلاپیتکەیە، ئێمە دەست و پەنجەی پێکەوە دەبڕین.''

 

ئەو فەرماندەیەی پێشووی سوپای پاسداران ئاماژەی بەوەش کرد، هەڕەشەکانی دۆناڵد ترەمپ کاریگەرییان لەسەر ئێران نابێت، ''ئێمە دوای 200 ساڵ یەکەم جارە گەیشتووینەتە ئەو توانا و هێزە.''

 

ماوەی 20 رۆژە خۆپێشاندان و ناڕەزایی شارەکانی ئێران و رۆژهەڵاتی کوردستانی گرتووەتەوە. چەند جارێک سەرۆکی ئەمریکا لە گوتار و نووسینەکانیدا لە تروس سۆشیال ئاماژەی بەوە کردووە، ئەوان پاڵپشتی لە خۆپێشاندەرانی ئێران و داخوازییەکانیان دەکەن و بە تووندترین شێوە وەڵامی تووندوتیژی هێزە ئەمنییەکانی ئێرانیش لە دژی خۆپێشاندەران دەدەنەوە.

 

موحسین رەزایی گوتی، ''هەرچەندە دانبەخۆداگرتنی ستراتیژی دەگرینەبەر، سەرنج نادەن. لێرەوە [هەڕەشەکان] رابگرن. چونکە نەکشێنەوە، هیچ بنکەیەکی سەربازیتان لە ناوچەکە پارێزراو نابێت.''

 

لە 28ـی کانوونی یەکەمی 2025ـوە ناڕەزایی و خۆپێشاندان دژی گرانی و دابەزینی نرخی تمەن لەلایەن کاسبکارانی تارانەوە دەستیپێکرد و دواتر سەرجەم پارێزگاکانی ئێرانی گرتەوە و لە زۆربەی شارەکاندا گرژی تێکەوت.

 

بەگوێرەی ئامارەکانی ئاژانسی چالاکڤانانی مافی مرۆڤی ئێران (هرانا)، لە سەرەتای ناڕەزایەتییەکانەوە تاوەکو کۆتایی رۆژی 19ـیەم، کوژرانی دوو هەزار و 677 کەس پشتڕاستکراوەتەوە کە 16ـیان منداڵن و 163ـیان هێزی ئەمنی و کەسانی سەر بە حکومەتن.

 

هەر بەگوێرەی ئامارەکە، بەدواداچوون بۆ پشتڕاستکردنەوەی کوژرانی هەزار و 693 کەسی دیکەیش دەکرێ.