دیسان ئێران و وڵاتانی ئەوروپا نەگەیشتنە ئەنجام
رووداو- ئاژانسەكان
خولێكی دیكەی دانووستانە ناوەكییەكانی ئێران لەنێوان سەعید جەلیلی، سەرۆكی ئەنجوومەنی ئاسایشی نەتەوەیی ئێران و كاترین ئاشتۆن، بەرپرسی سیاسەتی دەرەوەی یەكێتی ئەورووپا، لە شاری ئەستەنبوڵی توركیا بەبێ گەیشتن بە رێككەوتن كۆتایی هات، بەڵام هەردوولا دەڵێن "بە سوود" بووە.
جەلیلی و ئاشتۆن پاش وتووێژێكی چوار كاژێری لە كونسوڵخانەی ئێران لە ئەستەنبوڵ، وەک هەمیشە دانووستانەكانیان بە "بەسوود" لێكدایەوە و جەلیلی بە رۆژنامەنووسانی راگەیاند: "بڕیاردراوە لە ماوەیەكی نزیكدا بۆ لێكنزیكبوونەوەی روانگەكانمان، دیسان كۆببینەوە".
كاترین ئاشتۆن رایگەیاند: "لەم دانیشتنەدا جارێكی دیكە لەسەر ئەو پێشنیازانەی، كە پێشتر خراونەتەڕوو، وتووێژمان كرد و بۆ قۆناخێكی دیكەی دانیشتنەكانی ئەم پرۆسەیە زیاتر بیری لێ دەكەینەوە".
هاوكات لە ڤییەنناش عەلی ئەسغەر سوڵتانییە، نوێنەری هەمیشەیی ئێران لە ئاژانسی نێودەوڵەتی وزەی ئەتۆم و هێرمان ناكارێتس، جێگری سكرتێری گشتی ئاژانسی نێودەوڵەتی وزەی ئەتۆم، سەبارەت بە بەرنامە ئەتۆمییەكەی ئێران پێكەوە دانیشتنیان كرد، ئەو کۆبوونەوەیەش بەبێ گەیشتن بە هیچ دەرەنجامێك كۆتایی هات.
سوڵتانیە بە رۆژنامەنووسانی راگەیاند: "هەردوولا كۆمەڵێك پێشنیازیان خستووەتەڕوو و بڕیاردراوە هەردوولا ئەم پێشنیازانە تاووتوێ بكەن".
هێرمان ناكارێتس رایگەیاندووە: " 18 مانگە دانووستان لەگەڵ ئێران درێژەی هەیە و تاوەكو ئێستا سەركەوتنێكی بەدەست نەهێناوە."
یوكیا ئامانۆ، سكرتێری گشتی ئاژانسی نێودەوڵەتی وزەی ئەتۆم، لە سەرەتای ساڵی 2013ەوە كۆمەڵێك دانووستانی هەم خۆی بەشێوە راستەوخۆ و هەمیش لەڕێی جێگرەكانیەوە لەگەڵ ئێران ئەنجامداوە، بەڵام تاوەكو ئێستا بەرەوپێشچوونێكی تێدا بەدی نەكراوە.
كاترین ئاشتۆن بەر لە دەستپێكردنی دانووستانەكانی شەوی رابردوو گوتبووی: "چاوڕێی وەڵامێكی باش و دادپەروەرانەی ئێران بۆ پێشنیازەكانی گرووپی 1+5 دەكەین".
بەپێی راپۆرتی ئەسۆشێیتد پرێس، گرووپی 1+5 پێشنیازی بۆ ئێران كردبوو، كە بڕێك لە یۆرانیۆمی 20% پیتێنراو بۆ خۆی راگرێ، بەڵام لە بەرهەمهێنانی زیاتری یورانیۆم دەستهەڵگرێ.
كۆماری ئیسلامی ئێران بەدەستهێنانی وزەی ناوەكی بە مافی خۆی دەزانێ و وای راگەیاندووە، كە ئامانجی بەرهەمهێنانی چەكی ئەتۆمی نییە. وڵاتانی رۆژئاواش ئێران بە بەرهەمهێنانی چەكی ئەتۆمی تۆمەتبار دەكەن و خوازیاری روونبوونەوەی ناوەرۆكی پڕۆگرامە ناوكییەكانی ئێرانن.
و . فوئاد حەقیقی