وەزیری ناوخۆی پاکستان لەگەڵ پزیشکیان و قالیباف کۆبووەوە

 

 

رۆژی یەکشەممە، 17ـی ئایاری 2026، باڵیۆزخانەی پاکستان لە تاران ئەمڕۆ لە راگەیێندراوێکدا بڵاویکردەوە، موحسین نەقەوی، وەزیری ناوخۆی پاکستان، نزیکەی سێ کاژێر لە نووسینگەی سەرۆکایەتیی کۆماری ئێران ئامادە بووە و دیدارەکەی لەگەڵ مەسعود پزیشکیان نزیکەی 90 خولەکی خایاندووە.

 

لە راگەیێندراوەکەی باڵیۆزخانەی پاکستاندا هاتووە، عەباس عێراقچی، وەزیری دەرەوە و ئەسکەندەر موئمینی، وەزیری ناوخۆی ئێرانیش لە دیدارەکەدا ئامادە بوون.

 

بەپێی راگەیەندراوی نووسینگەی سەرۆکایەتیی کۆماری ئێران، مەسعود پزیشکیان لەو دیدارەدا رایگەیاندووە، ئەمریکا و ئیسرائیل بەنیاز بوون "گرووپە تیرۆریستییە چەکدارەکان لە ناوچەکانی باکووری رۆژئاوا و باشووری رۆژهەڵاتی ئێرانەوە" بنێرنە ناو خاکی ئێران، بەڵام وڵاتانی دراوسێ رێگەیان نەداوە خاکیان بەکاربهێنرێت. هەر لە بەر ئەوەش پزیشکیان سوپاسی حکومەتەکانی پاکستان، ئەفغانستان و عێراق دەکات.

 

بە گوێرەی میدیای فەرمیی ئێران، وەزیری ناوخۆی پاکستان هەروەها لەگەڵ محەمەدباقر قالیباف، سەرۆکی پەرلەمانی ئێران کۆبووەوە. قالیباف لە خولی یەکەمی دانوستاندنەکانی ئیسلامئاباد لە نێوان ئێران و ئەمریکا، سەرۆکایەتیی شاندی ئێرانی دەکرد.

 

میدیای ئێران بڵاویان کردەوە، سەرۆکی پەرلەمان لە دیدارەکەیدا لەگەڵ وەزیری ناوخۆی پاکستان گوتوویەتی، "شەڕی ئەمریکا و ئیسرائیل لەگەڵ ئێران دەریخست کە بوونی ئەمریکا لە وڵاتانی ناوچەکەدا نەک هەر ئاسایش بەدی ناهێنێت، بەڵکو زەوینەی نائارامی دەڕەخسێنێت."

 

وەزیری ناوخۆی پاکستان هیوای خواستووە کە "ئیسلامئاباد بتوانێت دانوستاندنەکانی نێوان ئێران و ئەمریکا بگەیێنێتە ئەنجام."

 

موحسین نەقەوی لە چوارچێوەی هەوڵە بەردەوامەکانی پاکستان بۆ ئاسانکاری لە گفتوگۆکان و برەودان بە ئاشتیی ناوچەیی، سەردانی ئێرانی کردووە.

 

رۆژی شەممە، 16ـی ئایار، موحسین نەقەوی، وەزیری ناوخۆی پاکستان بە سەردانێک گەیشتە تاران و لەگەڵ ئەسکەندەر موئمینی، هاوتا ئێرانییەکەی کۆبووەوە و "دەستپێکردنەوەی دانوستاندنەکانی نێوان ئێران و ئەمریکا"یان تاوتوێکرد.

 

بەپێی هەواڵی ئاژانسی "مێهر"، لە دیداری وەزیرانی ناوخۆی ئێران و پاکستاندا، دەربارەی پەیوەندییەکانی نێوان هەردوو وڵات و ئاسۆی دەستپێکردنەوەی دانوستاندنەکانی ئاشتی، گفتوگۆی ورد کراوە. لەم دانیشتنەدا هەروەها باسی چەند پرسێکی جێی بایەخی هەردوولا کرا، لەوانە ئاشتیی بەردەوام لە ناوچەکە و دوایین گۆڕانکارییە ناوچەییەکان.

 

بەگوێرەی میدیای ئێران، ئەسکەندەر موئمینی، وەزیری ناوخۆی ئێران لە دیدارەکەدا، ستایشی هەوڵە دڵسۆزانە و بەرپرسیارانەکانی ژەنەڕاڵ "عاسم مونیر"ی کردووە بۆ چارەسەرکردنی کێشەکان و رێزی لە رۆڵی بنیاتنەرانەی پاکستان گرتووە لە برەودان بە ئاشتی و سەقامگیریی ناوچەکەدا.