دوو پۆلیسی ئێران لە پارێزگای سیستان و بەلووچستان کوژران
رووداو دیجیتاڵ
میدیای ئێران دەڵێت، لە هێرشێکی چەکداریدا لە پارێزگای سیستان و بەلووچستان، دوو پۆلیس کوژران و فەرماندەیەکی پۆلیسیش بریندار بوو.
میدیای ئێران بڵاویکردەوە، بەهۆی دەستڕێژی گوللەوە بۆسەر ئۆتۆمبێلێکی پۆلیس لە شاری سیب سوران، دوو پۆلیس کوژران و ئەفسەرێکی پۆلیسیش برینداربوو.
بە گوێرەی میدیای ئێران، یونس سەیاد ئەربابی و ئیبراهیم پیری لە هێرشەکەدا کوژراون و ئیبراهیم فەزیلەتی، فەرماندەی پۆلیسی سیب سورانیش برینداربووە.
دوای هێرشەکە گرووپی سوننە مەزهەبی جەیشولعەدل کە گرووپێکی چەکداری بەلووچەکانە لە ئێران و پێگەکانی لەنێو پاکستاندان، بەرپرسیارێتی هێرشەکەی لە ئەستۆ گرت.
رۆژی 22ی ئابی 2025 لە هێرشێکی چەکداریدا لەسەر رێگەی خاش-ئیرانشاری سەر بە پارێزگای سیستان و بەلووچستانی ئێران، پێنج پۆلیس کوژران.
ناوە ناوە لەلایەن گرووپی سوننە مەزهەبی جەیشولعەدلەوە هێرش دەکرێتە سەر بنکەکانی پۆلیس لە ناوچەکانی سەر بە پارێزگای سیستان و بەلووچستان.