بەندکراوێک لە ئێران بە تۆمەتی سیخوڕیکردن بۆ ئیسرائیل لەسێدارەدرا

 

 

دەسەڵاتی دادوەریی ئێران رایگەیاند، بەرەبەیانی ئەمڕۆ چوارشەممە لە گرتووخانەی قزلحەساری کەرەج، سزای لەسێدارەدانی بابەک شەهبازی جێبەجێ کراوە. 

 

شەهبازی لە رۆژانی سەرەتای ساڵی 2024 لەلایەن هێزە ئەمنییەکانی ئێرانەوە دەستبەسەرکرا و بەپێی راپۆرتی دەسەڵاتی دادوەریی ئێران، بەهۆی پیشەکەی توانیویەتی زانیاریی هەستیار و نهێنی لەبارەی دامودەزگا ئەمنی و پەیوەندیدارەکانی ئێران بداتە ئیسرائیل. بابەک شەهبازی کاری دامەزراندنی سیستمی فێنککەرەوەی کردووە.

 

کەسوکارەکەی رەتیدەکەنەوە بابەک شەهبازی سیخوڕیی بۆ ئیسرائیل کردبێت و دەڵێن، دوای ئەوەی لە تۆڕە کۆمەڵایەتییەکان نامەیەکی بۆ ڤۆلۆدیمیر زیلینسکی، سەرۆکی ئۆکراینا ناردووە و تێیدا ئامادەیی خۆی دەربڕیوە تاوەکو بچێتە ئۆکراینا و دژی رووسیا شەڕ بکات، دەستبەسەر کراوە.

 

رێکخراوی مافی مرۆڤی ئێران دەڵێت، بابەک شەهبازی بەهۆی نووسینی ئەو نامەیە بۆ زیلینسکی دەستبەسەر کراوە و 9 مانگ لەژێر لێکۆڵینەوە و ئەشکەنجەدا بووە، بۆئەوەی دان بە تۆمەتی سیخوڕیکردن بۆ ئیسرائیل بنێت.

 

لە دوای جەنگی ئێران و ئیسرائیلەوە، لانیکەم 8 بەندکراو لە ئێران بە تۆمەتی سیخوڕیکردن بۆ ئیسرائیل لەسێدارە دراون. رێکخراوی مافی مرۆڤی ئێرانیش رایگەیاندووە، لە ساڵی 2025دا لانیکەم 940 کەس لەسێدارە دراون.