نێچیرڤان بارزانی، سەرۆکی هەرێمی کوردستان ئێوارەی دوێنێ شەممە، بە سەردانێکی فەرمیی بۆ بەشداریکردن لە کۆڕبەندی "دیالۆگی تاران"، گەیشە ئێران.
سەرۆکی هەرێمی کوردستان لە کۆڕبەندەکەدا لەبارەی چەندین پرسی تایبەت بە ناوچەکە قسەی کرد.
نێچیرڤان بارزانی باسی لە پەیوەندییەکانی نێوان هەرێمی کوردستان و کۆماریی ئیسلامیی ئێران کرد و گوتی، "پەیوەندییەکی مێژووییمان لەگەڵ کۆماری ئیسلامیی ئێران هەیە، ئەم پەیوەندییانە رۆژ دوای رۆژ گەشە دەکەن." گوتیشی، "ئێران یەکەم وڵات بوو لە کاتی شەڕی داعش یارمەتیی هەرێمی کوردستانی دا."
لە تەوەرێکی دیکەدا، نێچیرڤان بارزانی باسی لە پێشکەوتنی عێراق و پەیوەندیی نێوان بەغدا و هەولێر کرد.
سەرۆکی هەرێمی کوردستان گوتی، "عێراق وڵاتێکی زۆر گرنگە و دەتوانێت لە داهاتوودا رۆڵێکی زۆر گرنگ ببینێت."
لەبارەی کێشەکانی نێوان هەرێمی کوردستان و عێراقیش گوتی، "بەغدا لە چوارچێوەی دەستوور مامەڵە لەگەڵ هەرێمی کوردستان دا ناکات. بەغدا دەبێت پرسی فیدراڵی لەگەڵ هەرێمی کوردستان چارەسەر بکات."
نێچیرڤان بارزانی چارەسەری کێشەکانی نێوان هەولێر و بەغدای بۆ جێبەجێکردنی دەستوور گەڕاندەوە و گوتی، "ئێمە لە هەرێمی کوردستان داهاتوومان لەو چوارچێوەیەدا دەبینینەوە و دڵنیاین ئەگەر بیانەوێت دەستوور جێبەجێ بکەن، عێراق دەتوانێت زۆربەی کێشەکانی ئێستای نێوان هەرێمی کوردستان و بەغدا چارەسەر بکات."
سەرۆکی هەرێمی کوردستان لەبارەی پرسی چارەسەری تورکیاش قسەی کرد و ئاماژەی بەوەدا، "پرۆسەیەکە لە تورکیا دەستی پێکردووە، پرسی کورد بە شەڕ و خوێن چارەسەر ناکرێت. ئێمە یارمەتیی پرۆسەکە دەدەین، نەک دەستوەردان بکەین. ئەم پرۆسەیە جیدییە."
کۆڕبەندی "دیالۆگی تاران" دوو رۆژ بەردەوامدەبێت و بەیانی کۆتایی دێت.
هەرێمی کوردستان و کۆماریی ئیسلامیی ئێران پەیوەندییەکی بەهێزیان هەیە. لە پارەوە، ئەمە چوارەم سەردانی سەرۆکی هەرێمی کوردستانە بۆ تاران.
دەقی پرسیار و وەڵامی نێچیرڤان بارزانی لە کۆنگرەی "دیالۆگی تاران":
پرسیار: زۆر دڵخۆشم، بەڕێز بارزانی.
نێچیرڤان بارزانی: زۆر سوپاس، ئەگەر فارسییەکەشمان باش نەبوو، داوای لێبووردن دەکەم.
پرسیار: فارسیی ئێوە باشترە لە کوردی من، هەڵبەت کوردیی بەڕێز سەرۆککۆماریش.
نێچیرڤان بارزانی: لە فارسیی ئێمە باشترە. نا، بەڕاستی کوردیی بەڕێز سەرۆککۆمار قسەی تێدا نییە. باوەڕ بکەن، هەر پێیەوە دیار نییە [کورد نییە]، ئێمە ئەوەمان بینیوە.
پرسیار: ئێوە پشتڕاستی بکەنەوە ئیدی تەواوە.
نێچیرڤان بارزانی: بەڵێ، ئێمە پشتڕاستی دەکەینەوە؛ بەڕێزیان ئێستاش کە هاتن کوردی قسەیان کرد، گەورەییان نواند.
پرسیار: بەڕێزیان سەرۆککۆماری چەند زمانزانەی ئێمەن. زۆر سوپاس بەڕێز بارزانی، سەرۆکی بەڕێزی هەرێمی کوردستانی عێراق بۆ ئەوەی بانگهێشتەکەی ئێمەتان قبووڵ کرد، دڵخۆشم کە ئەم دەرفەتە بە من دراوە لەگەڵ ئێوە گفتوگۆ بکەم. کەمتر لە یەک مانگ و نیو لەمەوپێش میوانی ئێوە بووم. زۆر سوپاستان دەکەم لە هەوڵی ئێوە بۆ بەڕێوەبردنی ئەم کۆڕبەندە ناوازەیە و هیوادارم ئەم کۆڕە کە کۆڕی رۆشنبیران و سیاسییەکانـە، ئەمڕۆ بە باشی هەڵیبسەنگێنن و بتوانین تیشک بخەینە سەر هەندێک لە بابەتەکان.
نێچیرڤان بارزانی: ئەگەر چەند وشەیەک بە کوردی قسە بکەم. بێگومان زۆر خۆشحاڵم لەوەی کە بەشدار دەبم لەم کۆڕبەندە، سوپاس و پێزانینم هەیە بۆ جەنابیشت کە بانگهێشتی ئێمەت کرد. ئێمە هاتین بۆ تاران، زۆر خۆشحاڵم. هەوڵ دەدەم بە فارسی قسە بکەم، ئەگەر فارسییەکەم تۆزێک کێشەی تێکەوت، ئەوکات بەکوردی [قسە دەکەم].
ئێمە بە فارسی دەستپێدەکەین، باسی ئەوەم کرد لە خزمەتتان کە ئەگەر فارسییەکەم کێشەیەکی هەبوو، ئەو کات [دەیکەینە کوردی].
پرسیار: ئێوە زۆر بە باشی فارسی قسە دەکەن
نێچیرڤان بارزانی: تەنیا روخسەتم دەوێت، ئەوەی کە باست کرد یەک مانگ و نیو لەمەوپێش لە هەرێمی کوردستان بوون، من ویستم، هەر ئێستاش بە بەڕێز د. زەریفیشم گوت کە ئێمە بانگهێشتتان دەکەین. (رووی دەمی دەکاتە جەواد زەریف) بە هەر حاڵ، دەتوانن لە ئێوە ببیستن کە ئەو کۆڕبەندەی لەوێ بەڕێوەچوو، زۆر باش بوو و ئینشائەڵڵا سەردان دەکەن.
پرسیار: دەتوانم شایەتی بدەم کە دانیشتنێکی زۆر باش بوو. بەڕێز بارزانی، گۆڕانکارییەکانی ناوچەکە زۆر خێران. ئێوە لە هەرێمی کوردستان کە قسەتان دەکرد، ئاماژەتان بەوە دا کە عێراق و هەرێمی کوردستان رۆڵێکی زۆر گرنگیان لە گۆڕانکارییەکان هەیە و باستان لەوە کرد کە ئێوە چەندە لە بواری پەیوەندی لەگەڵ وڵاتانی دیکە سەرکەوتوو بوون. ئێستا ئێوە چی رۆڵێک بۆ عێراق لە داهاتووی ئەو گۆڕانکارییانەدا دەبینن؟
عێراق خەریکە لە قۆناخێکەوە دەچێتە قۆناخێکی دیکە. لە بابەتی سیاسیدا ئەگەر بمەوێت باس لە هەموو عێراق بکەم، ئێمە ئێستا لە چەند رۆژی رابردوودا لووتکەی کۆمکاری عەرەبیمان بەڕێوەبرد لە بەغدا و بە لەبەرچاوگرتنی دۆخێک کە لە ناوچەکەدا هەیە، پێمان وایە لووتکەیەکی زۆر سەرکەوتوو بوو کە هاوڕێیان و برایانی عەرەبمان لە وڵاتانی دیکەوە تێیدا بەشدار بوون.
عێراق وڵاتێکە کە بەم دواییانە پرسی شەڕی تێپەڕاندووە، کێشەکانی تێپەڕاندووە و خەریکە پێ دەنێتە قۆناخێکی سیاسیی گرنگ کە دەتوانێت رۆڵێکی کاریگەر وەک وڵاتێکی گرنگ لە ناوچەکە [بگێڕێت].
عێراق وڵاتێکە لە بواری سەرچاوە سرووشتییەکان، سەرچاوە مرۆییەکانەوە زۆر دەوڵەمەندە و بە سیاسەتی دروست و دووربینی یان خوێندنەوە بۆ داهاتوو، دەتوانێت رۆڵێکی کاریگەر و گرنگ لە ناوچەکەدا بگێڕێت.
پرسیار: ئێوە چۆن هەرێمی کوردستان لە چوارچێوەی عێراقدا پێناسە دەکەن؟
نێچیرڤان بارزانی: دۆخی کوردستان، با من بەو شێوە بڵێم، بەر لەوەی ئەمریکییەکان بێنە نێو عێراق لە ساڵی 2003، ئێمە هەر ئەو دۆخەمان هەبوو. ئەمریکییەکان هاتن و بە ئێمەیان گوت سیستمی [بەڕێوەبردنی] عێراق بۆ سیستمێکی دیموکراسی و فیدراڵی دەگۆڕدرێت و ئێمە هاوکاریمان کردن بۆ ئەوەی سەدام لە دەسەڵات لابدرێت. پێناسەی سیستم لە عێراق، ئەگەر ئێوە سەرنج بدەن، پێناسەیەکە دەڵێت، سیستمی فیدراڵی لە عێراق. بەداخەوە، من دەمەوێت ئەوە بڵێم تاوەکو ئێستا نەگەیشتووینەتە ئەو شوێنە، واتە عێراق زۆر دوورە لە فیدراڵیزمەوە. ئێمە لەگەڵ هاوڕێیانمان لە بەغدا گەنگەشەمان لەسەر ئەوەیە. ئێمە دەڵێین، لە جوگرافیایەکدا دەژین کە پێی دەگوترێت عێراق. ئێمە دەبێت مۆدێلێک [ی بەڕێوەبردن] پێناسە بکەین کە لە عێراق جێگەی رەزامەندیی هەمووان بێت. ئەو مۆدێلە لە دەستووری عێراقدا پێناسە کراوە و 80٪ـی خەڵکی عێراق دەنگیان بەو دەستوورە دا. ئێمە لە هەرێمی کوردستان داهاتوومان لەو چوارچێوەیەدا دەبینینەوە و دڵنیاین ئەگەر بیانەوێت دەستوور جێبەجێ بکەن، عێراق دەتوانێت زۆربەی کێشەکانی ئێستای نێوان هەرێمی کوردستان و بەغدا چارەسەر بکات.
من دەمەوێت بە ئێوە بڵێم، راستییەکە ئەوەیە، نامەوێت وەک گلەیی بیڵێم، بەڵام راستییەکە ئەوەیە مامەڵەی بەغدا لەگەڵ هەرێمی کوردستان بە هیچ شێوەیەک لە چوارچێوەی فیدراڵیزمدا نییە. هەڵبەت من لە بەغدا بە هاوڕێیانم گوتووە کە کێشەکە ئەوەیە کاتێک ئێوەش چاو لە هەرێم دەکەن، وا بیر دەکەنەوە کە ئێمە زۆر زیاتر لەگەڵ خودی بەڕێز عادل عەبدولمەهدی کە لێرەن و ئەوکات سەرۆکوەزیران بوو، ئەو گەنگەشەیەمان هەبووە؛ گوتوومە ئێوە کاتێک چاو لە هەرێمی کوردستان دەکەن، وا بیردەکەنەوە کە ئێمە زیاتر لە دەستوور دەسەڵات بە خۆمان دەدەین. ئێمە دەبێت پێکەوە بێ پەردە دابنیشین و بزانین لە کامە خاڵ دەتوانین بە یەکدی بگەین؛ ئەوە وەک بنەمای عێراقی نوێ دابنێین و دەکرێت جێبەجێش بکرێت (دوور نییە لە جێبەجێکردن). ئێستا کاتیەتی و من دەڵێم هەموو ئەو کێشانەی لە عێراق هەبوون، خەریکە بەرە بەرە چارەسەر دەکرێن. عێراق یەکەم کار کە دەبێت بۆ سەقامگیریی سیاسی بیکات، پێویستە پرسی فیدراڵی لەگەڵ کوردستان 100٪ چارەسەر بکات.
پرسیار: رۆڵی هەرێمی کوردستان لە پەرەپێدانی پەیوەندییەکانی عێراق و ئێران چییە؟
نێچیرڤان بارزانی: ئێمە لە هەرێم پەیوەندییەکانمان لەگەڵ ئێران پەیوەندیی مێژوویین؛ پەیوەندیی مێژوویی، کولتووری، زمانی، هەموو ئەوانە هەن و نزیکین لە یەکدی. ئەگەر ئێوە چاو لە بواری ئابوورییەکەی بکەن، نزیکەی 60٪ـی ئەو ئاڵوگۆڕییە بازرگانییەی کۆماری ئیسلامیی ئێران لەگەڵ عێراق هەیەتی، لە رێگەی هەرێمی کوردستانەوە دەچێتە عێراق، واتە ئێمە لە بواری ئابوورییەوە پەیوەندییەکی زۆر باشمان پێکەوە هەیە. ئێمە دەبینین ئاستی ئەو پەیوەندییانە رۆژ بە رۆژ باشتر دەبن. بۆ نموونە، ئێمە لە هەفتەی داهاتوودا دانیشتنێکی دیکەمان هەیە کە پارێزگارەکانی هەرێمی کوردستان و [پارێزگارە سنوورییەکانی رۆژهەڵاتی کوردستان] پێکەوە دادەنیشن و گەشتێکیشیان هەیە بۆ تاران کە لەوانەیە سەرۆککۆماریش ببینن.
ئەو پەیوەندییە کولتووری و مێژووییانەی لەگەڵ ئێران هەمانە، هەموو کات وەک دراوسێیەک چاو لەو بابەتە دەکەین و لە هەر کاتێکیشدا تووشی گرفتێک بووبین، ئێران یارمەتیی ئێمەی داوە. وەک یەکەم جار ئەگەر باس لە پرسی هەڵەبجە بکەین؛ لەدوای هەڵەبجە ئاوارەکانی چەندین ساڵە؛ لە شەڕی داعشدا ئێران لەو وڵاتانە بوو کە لە راستیدا یەکەم وڵات بوو لە شەڕی داعشدا یارمەتیی ئێمەی دا و خودا لێی خۆشبێت، بەڕێز سەردار سولەیمانی لە یەکەم کەسەکان بوو، کە هەر لەو شەوەدا کە زۆر کێشە دروست بوو هاتە هەولێر. ئێمە لە هەموو شوێنێک ئەوەمان گوتووە و راشکاوانە ئەوەمان باس کردووە.
ئەو پەیوەندییەی ئێمە پەیوەندییەکی باشە لە هەموو بوارەکان و من لە خزمەت ئێوە دەمگوت کە لەدوای سەردانەکەی بەڕێز سەرۆککۆمار پزیشکیان بۆ بەغدا کە دواتر هاتنە هەولێر، ئێمە ئێستا لە هەموو بوارەکاندا پەرەپێدان بەو پەیوەندییانە دەبینین؛ لە بواری سیاسی، کولتووری، زانکۆ و بازرگانی. ئێمە پێشکەوتنی باشمان [لە پەیوەندییەکاندا] لە هەموو بوارەکان بەدەستهێناوە.
پرسیار: باست لە سەردانەکەی سەرۆککۆکار پزیشکیان کرد بۆ بەغدا و هەولێر، پێدەچێت ئەو سەردانە لاپەڕەیەکی نوێی لە پەیوەندییەکان هەڵدابێتەوە؟
نێچیرڤان بارزانی: بێگومان. سەیربکەن، بە هەر حاڵ، ئێمە بەرزی و نزمی لە پەیوەندییەکانماندا هەبووە. من لەو سەردانەدا کە بۆ تاران هەمبوو، هەڵبەت بەر لەوەی کە بەڕێز پزیشکیان ببێتە سەرۆککۆمار، چوومە خزمەت خوالێخۆشبوو بەڕێز رەئیسی کە سەرۆککۆمار بوو؛ هەروەها چوومە خزمەت رێبەری باڵای ئێران و پرسەکانمان زۆر بە روونی باس کردن. ئەو گۆڕانکارییەی لە پەیوەندییەکاندا دروست بوو، لەدوای لوتف و دیداری رێبەری کۆماری ئیسلامی لەگەڵ من بوو کە بووە خاڵی بەهێزی پەیوەندییەکانی ئێمە.
بەڕێز د. پزیشکیان گوتی، لە یەکەم سەرداندا دێتە عێراق؛ گوتم بێگومان ئێمە بانگهێشتتان دەکەین کە بێنە هەولێر؛ بەڕێزیان پێشتر هاتبوو بۆ هەولێر، بەڵام کاتێک مامۆستای زانکۆ یان سەرۆکی زانکۆی تەورێز بووە. بەڕێز سەرۆککۆمار ئەو کات زانیارییەکی لەسەر هەولێر هەبوو، نازانم ئێوە لەگەڵی بوون یان نا.
پرسیار: نەخێر.
نێچیرڤان بارزانی: لەوێ نەبوویت، بەڵام براکانمان لەوێ بوون، کاتێک بەڕێز سەرۆککۆمار هاتە بەغدا و هەولێر، لە هەولێر بە کوردییەک قسەی کرد، بە زمانی کوردی وەها قسەی دەکرد کە هەموو سەریان سووڕما.
پرسیار: من ئەوەم بینیوە.
نێچیرڤان بارزانی: بینیوتە ئیدی؟ داوای لە منیش کرد فارسی قسە بکەم کە پێم وایە سەرۆککۆماریش نەختێک سەری سوڕما کە فارسییەکەم باشە. بە بۆچوونی من، سەردانی بەڕێز سەرۆککۆمار هەر بەو شێوەیەی باسم کرد، لەدوای سەردانەکەی ئێمە، بە کردەوە دەبینین کە [کاریگەری هەبوو و] لە هەموو پرس و ئاستەکاندا پەیوەندییەکان بەرەو پێشەوە دەچن. هەر ئەو پرسە ئابوورییە و دانیشتنە کە بڕیارە بەمزووانە لە سنە بەڕێوەبچێت خۆی یەکێک لە دەستکەوتەکانی گرنگی سەردانی بەڕێز سەرۆککۆمار بوو.
تەماشا بکە، بەڕێز سەرۆککۆمار بڕوای بەو شتە هەیە کە دەیڵێت، باوەڕی تەواوی پێیە و گوتی، دەبێت ئێمە لە ناوچەکە هاوکاریی یەکدی بکەین، دەبێت پێکەوە بین. خەریکە ئێمە ئەوە لە بەڕێزیان دەبینین، واتە ئێمە دەبینین کە دوای ئەوەی وەک سەرۆککۆمار ئەو پۆستەی وەرگرت، خەریکە پەیوەندییەکانیان لەگەڵ هەموو عێراق بەتایبەتی لەگەڵ هەرێمی کوردستان بەردەوام بەرەو پێشەوە دەچن، بۆ نموونە، هەر لەو دیدارانەی هەمانبوون لەدوای سەردانەکەی بەڕێزیان، بابەتی زیارەتکارانی ئێرانی کە لە [رێگەی] کوردستانەوە دەچنە نەجەف و کەربەلا، ئێستا زۆر رێکخراوتر(سیستماتیک) بووە و میکانیزمێکمان بۆ پێناسە کردووە. دوای ئەوەی کە بەڕێز سەرۆککۆمار فەرمانی دەرکرد، ئێستا دەبینین کە خەریکە لە تەواوی ئەو پرسانەدا بەرەو پێشەوە دەچین.
پرسیار: ئەو گۆڕانکارییانەی سەبارەت بە پەکەکە روودەدەن، ئایا دەکرێت سەرەتایەک بێت بۆ کۆتاییهێنان بەو تێکهەڵچوونە دوور و درێژانە؟ دەزانن کۆماری ئیسلامیی ئێرانیش تێبینیی ئەمنیی خۆی لە رابردوودا هەبووە و رووبەڕووی ئەو هەڕەشە و هێرشانە بووەتەوە کە وردەکارییەکانمان گەیاندووەتە خزمەت ئێوە. پێدەچێت دوای سەردانەکەی بەڕێز پزیشکیان لەوبارەشەوە ئێمە دەستکەوتی باشمان هەبووبێ.
نێچیرڤان بارزانی: تەماشا بکە، لە بواری ئەمنییەوە من با ئەوە بڵێم، دواتر دەتوانین سەبارەت بە پەکەکەش قسە بکەین. لە بواری ئەمنییەوە ئێمە پێشکەوتنی باشمان هەیە. میکانیزمێکمان دیاری کرد کە بەغدا و هەولێر و کۆماری ئیسلامی پێکەوە تێیدا کار دەکەن. بە هەر حاڵ، بابەتێك بە جیدی بۆ ئێمە زۆر گرنگە؛ ئێمە رێگە نادەین هەرێمی کوردستان سەرچاوەی مەترسی بێت بۆ دراوسێکان، بەتایبەتی کۆماری ئیسلامی. ئەوە یەکێک لە پرەنسیپەکانە کە ئێمە لە کوردستانی عێراق پێیەوە پابەندین و بە هاوکاریی عێراق خەریکە ئەو میکانیزمەی پێناسەمان کردووە و [لیژنەی سێ لایەنەکە]بەردەوام دانیشتنیان هەیە بە خۆشحاڵییەوە. ئینجا من دوێنێ شەو هەندێک دانیشتنیشم هەبوو لە تاران، هەموومان ئەوە دەزانین کە تاوەکو ئێستا لە بواری ئەمنییەوە قۆناخی باشمان بڕیوە و دووپاتی دەکەینەوە خاکی هەرێمی کوردستان سەرچاوەی مەترسی نییە بۆ کۆماری ئیسلامیی ئێران و ناشبێت.
پرسیار: زۆر پەیامێکی روونە. ئەی سەبارەت بە پەکەکە؟
نێچیرڤان بارزانی: لەبارەی پەکەکەوە بەڵێ، پڕۆسەیەک دەستیپێکردووە لە تورکیا. بە بۆچوونی ئێمە، بە هەر حاڵ، پرسی کورد ناکرێت لە رێگەی شەڕ و خوێنڕشتنەوە چارەسەر بکرێت. ئەو رۆڵەی ئێمە لە کوردستانی عێراق دەیگێڕین ئەوەیە کە هاوکار بین، دەستوەردان ناکەین، نە لە کاروباری نێوخۆی تورکیا و نە لە کاروباری نێوخۆیی هیچ وڵاتێکی دیکە، بەڵام ئەگەر بتوانین لە چوارچێوەی ئەو بابەتەدا یارمەتیدەر بین بۆ تورکیا، ئەو ئامادەییەمان هەیە.
ئەو پڕۆسەیە لە تورکیا دەستیپێکردووە و جیدییە، کە لەلایەکەوە پەکەکە هەیە، لە لایەکی دیکەوە دەم پارتی و لە لایەکی دیکەشەوە بەڕێز ئۆجەلان. ئەو سێیانە، کۆڵەکەی سەرەکیی ئەو پڕۆسەیەن کە ئێستا پێیەوە سەرقاڵن و ئێمە رامانگەیاندووە کە هەر هاوکارییەک لەلایەن ئێمەوە پێویست بێ، ئامادەین رۆڵی خۆمان بگێڕین؛ رۆڵێک کە ئینشائەڵڵا ئەو کێشەیەی پەکەکە و کێشەکان لە تورکیا چارەسەر بکات، چونکە ئەو کێشەیە بە ئۆپەراسیۆنی سەربازی چارەسەر نابێت.
پرسیار: رێگەم پێدەدەیت پرسیارێکی جیاواز لە سیاسەت بپرسم؟ ئێوە کە دێنە ئێران، چی زیاتر سەرنجتان رادەکێشێت؟ جگە لە زمانی فارسی و بیرەوەریی هاوبەش.
نێچیرڤان بارزانی: هەر ئەو بیرەوەرییانەی باست کردن. تەماشا بکە، ئێران وڵاتێک بووە ئێمەی قبووڵ کردووە وەک پەناخواز کاتێک هاتین؛ لە راستیدا پەناخواز نەبووین، ئێمەیان وەکو هاووڵاتیی خۆیان قبووڵ کرد، تەنانەت میوان نەبووین، خاوەن ماڵ بووین. ئەو بیرەوەرییانە ئێمە لەگەڵ ئێران هەمانن بە جۆرێکن کە دەمێننەوە. لە هەمان کاتدا کاتێک دێم بۆ ئێران، ئەو شوێنەی کە هەموو جارێک دەمەوێت بیبینم، عەزیمییەی کەرەجە.
پرسیار: (رووی زاری کردە میوانەکان) هاوڕێیانی کەرەج ئەگەر لێرەن، لەوانەیە بەڕێز نێچیرڤان ئەمڕۆ بچێتە ئەوێ.
نێچیرڤان بارزانی: بە هاوڕێیانیشمان گوتووە کە بەرنامەیەک هەبێت؛ هاوبەشیی زۆرمان هەیە پێکەوە، هەمووکات ئەم وڵاتە بە ماڵی خۆمان دەزانین.
پرسیار: زۆر سوپاس. دەتوانم شایەتی ئەوە بدەم کە بەڕێزتان یەکێک لە ئەندازیارانی پەیوەندییە زۆر پتەوەکانی ئەم دوو وڵاتەن. زۆر سوپاس کە بەشداریتان کرد.
نێچیرڤان بارزانی: زۆر سوپاس.