بۆ 'کەمکردنەوەی گوشار لەسەر کارەبا' لە تاران رۆژی شەممە کرایە پشوو

 

 

رۆژی دووشەممە، 18ی ئابی 2025، محەممەد سادق موعتەمیدیان، پارێزگاری تاران رایگەیاند، "بە مەبەستی کەمکردنەوەی گوشار لەسەر تۆڕی کارەبا و کەمتر بەکارهێنانی ئاو، رۆژی شەممە 23ی ئاب سەرجەم دامەزراوە حکومییەکان، قوتابخانە و زانکۆکان و بانکەکان دەبێتە پشوو."

 

محەممەد سادق موعتەمیدیان دەڵێت، پشووەکە، دامەزراوە خزمەتگوازی و فریاگوزارییەکانی وەکو نەخۆشخانە، بنکە تەندروستییەکان و ناوەندە ئەمنییەکان ناگرێتەوە.

 

محەممەد سادق موعتەمیدیان داوای لە سەرجەم فەرمانگەکانی پارێزگاکە کرد، لە کاتی پشوو سیستمی فێنککەرەوە بکوژێنەوە.

 

هەروەها پارێزگاری تاران، داوای لە خەڵک کرد، دەست بە بەکارهێنانی کارەبا و ئاو بگرن.

 

جگە لە تاران چەند پارێزگای دیکە لە ئێران رۆژی شەممەی داهاتوویان کردووەتە پشوو.

 

پشووەکان لە ئێران و رۆژهەڵاتی کوردستان پێی ناوەتە پێنجەم هەفتە، لە مانگی رابردوو پلەی گەرما لە پارێزگاکانی رۆژهەڵاتی کوردستان بەرزبووەوە و لە هەندێک ناوچە گەیشتە 50 پلەی سیلیزی.

 

کەمی کارەبا و ئاو لە کاتی گەرمادا هۆکاری سەرەکی پشووکانی ئێران و رۆژهەڵاتی کوردستانن.