پزیشکیان: رووداوەکانی ئەم دواییە پڕۆژە بوون بۆ رووخاندنی دەسەڵات

 

مەسعود پزیشکیان، سەرۆککۆماری ئێران، ئەمڕۆ چوارشەممە 21ی کانوونی دووەمی 2026، لەسەر پێشهات و گرژییەکانی چەند هەفتەی رابردووی وڵاتەکەی قسەی کرد و رایگەیاند: "لە خاڵێکی دیاریکراوەوە پێشهاتەکانی ئەم دواییە تەنیا ناڕەزایەتی نەبوون، بەڵکو بوونە پڕۆژەیەک، کە ئامانجی خستنی دەسەڵات بوو."

 

سەبارەت بە شێوازی مامەڵەکردنی حکومەت، پزیشکیان گوتی: "پێویستە قبووڵی بکەین لە رەوتی بەڕێوەبردنی کاروبارەکاندا هەڵەمان کردووە. ئەگەر ئاگاداری هەڵەکانمان نەبین و هەوڵی راستکردنەوەیان نەدەین و تەنیا کەسانی دیکە تاوانبار بکەین، سەرکەوتوو نابین."

 

سەرۆککۆماری ئێران هۆشداریش دەداتە دامودەزگاکانی حکومەت و دەڵێت، کاتێک گوێ لە داخوازی و کێشەی توێژە لاوازەکان نەگیرێت، "نابێت چاوەڕوانی ئەوە بکرێت کە کۆمەڵگە بەرەو تووندوتیژی و دوورکەوتنەوە لە نیشتمان و دەسەڵات نەچێت."

 

پزیشکیان ئاماژەی بە راپۆرتێکی وەزارەتی ئیتڵاعات کرد و گوتی: "لە لایەن وەزیری ئیتڵاعاتەوە سەبارەت بە هۆکاری رووداوەکانی ئەم دواییە راپۆرتێکمان پێگەیشتووە؛ پێویستە وردەکارییەکانی ئەو راپۆرتە سەبارەت بە هۆکار و فاکتەرەکان ئاشکرا بکرێت، بۆ ئەوەی کۆمەڵگە لە راستی و لایەنە جۆراوجۆرەکانی ئەو رووداوانە ئاگادار بێت."

 

خۆپێشاندانەکانی ئەم دواییەی ئێران لە 28ی کانوونی یەکەمی 2025 بەهۆی گرانی و دابەزینی بەهای تمەن لەلایەن کاسبکارانی تارانەوە دەستیپێکرد، دواتر ئاگرەکەی گەیشتە پارێزگاکانی دیکە و تووندوتیژی لێکەوتەوە.

 

بەگوێرەی ئاماری رێکخراوی مافی مرۆڤی ئێران (هرانا) 4 هەزار و 519 کەس کوژراون، کە 197 کەسیان لە هێزە ئەمنییەکانن.