هاتووچۆی ئێران: لە ساڵێکدا 3,000 منداڵ بە رووداوی هاتووچۆ گیانیان لەدەستداوە

 

 

تەیموور حوسێنی، بەڕێوەبەری پۆلیسی هاتووچۆی ئێران رایگەیاند، بە دەستپێکردنەوەی ساڵی نوێی خوێندن هاتووچۆ لەنێو شارەکان نزیکەی 20٪ زیاتر دەبێ و بەوەش ژمارەی رووداوەکانی هاتووچۆش زیاتر دەبێ.

 

بەڕێوەبەری پۆلیسی هاتووچۆی ئێران گوتی: "ساڵی رابردوو زیاتر لە 20 هەزار کەس لە سەرانسەری ئێران بە رووداوی هاتووچۆ گیانیان لەدەستدا کە نزیکەی سێ هەزار کەسیان منداڵ بوون."

 

بە گوتەی تەیموور حوسێنی، بۆ کەمکردنەوەی رووداوەکانی هاتووچۆ و ژمارەی قوربانیانی، پێویستە هەموو دامودەزگە حکومییەکان، وەک وەزارەتی پەروەردە، شارەوانییەکان و بەڕێوەبەرایەتییەکانی رێگەوبان، هەروەها هاووڵاتیان هاوکاریی پۆلیسی هاتووچۆ بکەن.

 

بەڕێوەبەری پۆلیسی هاتووچۆی ئێران ئەوەشی خستەڕوو، بۆ پاراستنی گیانی منداڵان و قوتابیان، پلانێکیان بۆ کاتی دەستپێکردنی ساڵی نوێی خوێندن ئامادە کردووە و بڕیارە گەڕانەکانی پۆلیس لە نزیک قوتابخانەکان چالاک بکرێن.

 

ساڵانە لە ئێران و رۆژهەڵاتی کوردستان، هەزاران کەس بە رووداوی هاتووچۆ گیان لەدەستدەدەن. 

 

سبەی وەرزی نوێی خوێندن لە رۆژهەڵاتی کوردستان و ئێران دەستپێدەکات. 

 

بەگوێرەی دادپزیشکیی ئێران، لە 21-03-2024 تاوەکو 21-03-2025، 20 هەزار و 45 کەس لە ئێران و رۆژهەڵاتی کوردستان بە رووداوی هاتووچۆ گیانیان لەدەستداوە.