ئەمریکا سزای نوێی بەسەر ئێراندا سەپاند

 

 

نووسینگەی کۆنترۆڵی سەرمایە بیانییەکان (OFAC) سەر بە وەزارەتی گەنجینەی ئەمریکا "9 کەشتیی سێبەر و 8 کۆمپانیای خاوەندارێتی و بەڕێوەبردنی کەشتییەکانی خستە لیستی سزاکانەوە."

 

ئەمریکا دەڵێت، "ئەم کەشتیانە پێکەوە بایی سەدان ملیۆن دۆلار نەوت و بەرهەمە پێترۆکیمیاییەکانی ئێرانیان بۆ بازاڕە دەرەکییەکان گواستووەتەوە." واشنتن هەروەها دەڵێ، ئەم داهاتە کە مافی گەلی ئێرانە، "لەبری خزمەتگوزارییە ئابوورییە سەرەتاییەکان، بۆ پارەدارکردنی گرووپە تیرۆریستییە پاشکۆکانی ئێران لە ناوچەکە، بەرنامەی چەک و دەزگا ئەمنییەکان بەکاردەهێندرێت."

 

سکۆت بێسێنت، وەزیری گەنجینەی ئەمریکا رایگەیاند، "ئابووریی رژێمی ئێران خەریکی خۆلەنێوبردنە و ئەم پڕۆسەیەش بەهۆی هەڵمەتی ئەوپەڕی گوشاری سەرۆک ترەمپ خێراتر بووە."

 

بێسێنت ئاماژەی بەوە کرد، "بڕیاری تاران بۆ پاڵپشتیکردنی تێرۆریستان لەبری گەلەکەی، بووەتە هۆی هەرەسهێنانی بەهای تمەن و تێکچوونی بژێوی خەڵک."

 

وەزیری گەنجینەی ئەمریکا گوتیشی، "ئێمە بەردەوام دەبین لە شوێنکەوتنی ئەو دەیان ملیۆن دۆلارەی کە رژێمی ئێران دزیویەتی و بە نائومێدییەوە هەوڵ دەدات بۆ بانکەکانی دەرەوەی وڵاتی بگوازێتەوە."

 

 

 

1- کەشتیی SEA BIRD (ئاڵای دوورگەکانی پاڵاو) کۆمپانیای (هۆرایزن هارڤێست) لە ئیمارات.

 

2- کەشتیی AVON (ئاڵای کۆمۆرۆس) کۆمپانیای (ئایات) لە هیندستان.

 

3- کەشتیی AL DIAB II (ئاڵای دوورگەکانی پاڵاو) کۆمپانیای (بلاک ستۆون) لە عومان.

 

4- کەشتیی CESARIA (ئاڵای دوورگەکانی پاڵاو) کۆمپانیای (گالێران) لە سیشێڵ.

 

5- کەشتیی LONGEVITY 7 سەر بە کۆمپانیای (لۆنجێڤیتی) لە دوورگەکانی مارشاڵ.

 

هەروەها کۆمپانیاکانی (ئۆدێسی مارین)، (بێنئۆیل شیپینگ) و (ترەید بریج گڵۆبڵ) خراونەتە لیستی رەشەوە.

 

 

بەپێی بڕیارەکە، هەموو دارایی و بەرژەوەندییەکانی ئەم کۆمپانیا و کەشتیانە لە ئەمریکا یان لە ژێر کۆنترۆڵی کەسانی ئەمریکیدا بێت، سڕدەکرێن؛ هەر مامەڵەیەکی دارایی یان بازرگانی لەگەڵیان قەدەخەیە و سەرپێچیکاران رووبەڕووی سزا دەبنەوە.

 

وەزارەتی گەنجینە دەڵێت، "ئامانجی ئەم سزایانە سزادان نییە، بەڵکو گۆڕینی رەفتارە تووندڕۆییەکانی تارانە."

 

ئەم سزایانە لە چوارچێوەی فەرمانی جێبەجێکردنی 13902 دەرچووە، کە کەرتی نەوت و پترۆکیمیای ئێران دەکاتە ئامانج بۆ جێبەجێکردنی ستراتیژیی "ئەوپەڕی گوشاری ئابووری."