سەرۆک و ئەندامانی دەستەی سەرۆکایەتیی پەرلەمانی ئێران هەڵبژێردران

 

رۆژی سێشەممە، هەڵبژاردنی دەستەی سەرۆکایەتیی پەرلەمانی ئێران بەڕێوەچوو و محەممەدباقر قالیباف جارێکی دیکە وەکو سەرۆکی پەرلەمان هەڵبژێردرایەوە. قالیباف لە ساڵی 2020ـەوە سەرۆکی پەرلەمانی ئێرانە.

 

هەروەها عەلی نیکزاد، پەرلەمانتاری ئەردەبیل و حەمیدڕەزا حاجی‌بابایی، پەرلەمانتاری هەمەدان وەکو جێگری یەکەم و دووەمی سەرۆکی پەرلەمان هەڵبژێردران. 

 

دەستەی سەرۆکایەتیی پەرلەمانی ئێران لە سەرۆک، دوو جێگری سەرۆک، شەش سکرتێر و سێ چاودێر پێکدێت.

 

موجتەبا بەخشیپوور، پەرلەمانتاری ئیسلاماوا و داڵاهۆی پارێزگای کرماشان وەکو سکرتێر و عەباس گودەرزی، پەرلەمانتاری بروجێردی پارێزگای لوڕستانیش وەکو چاودێر لە دەستەی سەرۆکایەتیی پەرلەمانی ئێران هەڵبژێردران.

 

هەڵبژاردنی دەستەی سەرۆکایەتیی پەرلەمانی ئێران ساڵانەیە و هەموو ساڵێک لە سەرەتاکانی سێیەم مانگی بەهاردا، هەڵبژاردنی دەستەی سەرۆکایەتی بەڕێوەدەچێت. 

 

پەرلەمانی ئێران 290 پەرلەمانتاری هەیە و خولی 12یەمی پەرلەمان لە 27-05-2024ـەوە دەستیپێکردووە. لە خولەکانی رابردوودا، پەرلەمانتارانی شیعە مەزهەبی رۆژهەڵاتی کوردستان بۆ جێگری سەرۆکی پەرلەمانیش دەنگیان هێناوەتەوە.