پۆلیسی ئێران: رێگە نادەین ئاسایشی سنوورەکان تێکبچێت

 

 

ئەمڕۆ چوارشەممە 27ی ئابی 2025 قاسم رەزایی، جێگری فەرماندەی گشتیی پۆلیسی ئێران لە کۆبوونەوەی لیژنەی هەواڵگری و ئۆپەراسیۆنە تایبەتەکانی پاسەوانیی سنوور لە پارێزگای سنە ئامادە بوو، جەختی لە پاراستنی ئاسایشی سنوورەکان کردەوە.

 

قاسم رەزایی گوتی، "هێزەکانی پاسەوانیی سنوور بە هۆشیاری و وریاییەکی تەواوەوە بۆ پاراستنی سنوورەکان ئامادەن، رێگە نادەن هیچ نائەمنییەک لە سنوورەکان رووبدات." گوتیشی، "پاسەوانیی سنوور بەرگەی هیچ نائەمنییەک لە سنوورەکان ناگرێت و رێگە نادات ئاسایشی سنوورەکان تێکبچێت."

 

جێگری فەرماندەی گشتیی پۆلیسی ئێران جەختی لەوە کردەوە، هەواڵگری و ئامادەیی بۆ ئۆپەراسیۆنەکان لە گرنگترین ستراتیژییەکانن بۆ ئەنجامدانی ئەرکەکانی هێزەکانی پاسەوانیی سنوور و هەموو ئۆپەراسیۆنەکان بەبێ زانیاریی ورد و دروست ناتەواو دەبن.

 

رۆژی دووشەممە 25ی ئابی 2025، لە رێوڕەسمی دەستبەکاربوونی فەرماندەی نوێی پۆلیسی پارێزگای سنە، جێگری فەرماندەی گشتیی پۆلیسی ئێران هۆشداری دابوو بە کۆڵبەران کە لەسەر سنوورەکان هاتووچۆ نەکەن و گوتبووی، هەندێک کەس لە ژێر ناوی کۆڵبەری بە قاچاخ چەک دەگوازنە نێو ئێران.

 

لەوبارەوە رەزایی رایگەیاند، "بەگوێرەی بەڵگەنامەکان، هەندێک کەس لەژێر پەردەی کۆڵبەریدا چەک و کەلوپەلی نایاسایی دەهێننە نێو وڵاتەوە، بۆیە چۆنیەتی مامەڵە لەگەڵ ئەو کەسانە جیاوازە و بە توندی رووبەڕوویان دەبینەوە."

 

بە گوتەی رەزایی، هاتووچۆی نایاسایی لە سنوورەکان لەلایەن هەر کەسێکەوە بێت نایاساییە، تەنانەت ئەگەر هیچیش لەگەڵ خۆیدا نەهێنێت.