هێزە چەکدارەکانی ئێران: زەبرێک لە ئەمریکا و ئیسرائیل دەدەین لە مێژوویاندا ئەزموونیان نەکردبێت

 

 

ئەمڕۆ شەممە 28ی شوباتی 2026، ئەبولفەزڵ شکارچی، گوتەبێژی گشتیی هێزە چەکدارەکانی ئێران بە میدیای فەرمیی وڵاتەکەی گوت، "زەبرێک لە ئەمریکا و ئیسرائیل دەوەشێنین کە لە مێژوویاندا ئەزموونیان نەکردبێت."

 

شکارچی دەشڵێت، "هەر لایەنێک لەم هێرشانەدا یارمەتی ئەمریکا و ئیسرائیل بدات، دەکرێتە ئامانجی هێزە چەکدارەکانی ئێران."

 

گوتەبێژی گشتیی هێزە چەکدارەکانی ئێران دەڵێت، کارەکە تازە دەستیپێکردووە و هەر ئێستا بنکە سەربازییەکانی ئیسرائیل تووشی کێشە بوون.

 

شکارچی داوای لە خەڵکی ئێران کرد، هێور بن و ئاسایشی وڵات بە هێزە چەکدارەکان بسپێرن.

 

هێرشە هاوبەشەکەی ئەمڕۆی ئەمریکا و ئیسرائیل دەوروبەری کاژێر 09:30 بە کاتی هەولێر دەستیپێکرد، تاوەکو ئێستا حکومەتی ئێران هیچ ئامارێکی لە کوژراو و بریندارەکان بڵاونەکردووەتەوە.

 

ترەمپ و نەتەنیاهوو لە دوو پەیامی ڤیدیۆییدا روو بە خەڵکی ئێران گوتیان، لە ماڵەکانتان بمێننەوە تاوەکو هێرشەکانیان تەواو دەبن.