قەڵای 'فەلەک ئەفلاک'ی لوڕستان بەهۆی بۆردوومان خەریکە دەڕووخێت
رووداو دیجیتاڵ
بەهۆی هێرشەکانی ئەمریکا و ئیسرائیلەوە، قەڵای مێژوویی فەلەک ئەفلاکی پارێزگای لوڕستان زیانی بەرکەوتووە. بەڕێوەبەری گشتیی میراتی کولتووری و گەشتوگوزاری پارێزگاکە دەڵێت، درزی زۆری تێکەوتووە و نیگەرانییەکان لەبارەی رووخانی قەڵاکە زیادیکردووە.
ئەمڕۆ شەممە 28-03-2026 عەتا حەسەنپوور، بەڕێوەبەری گشتیی میراتی کولتووری، گەشتوگوزار و پیشە دەستییەکانی لوڕستانی رۆژهەڵاتی کوردستان رایگەیاند، هەڵسەنگاندنەکان دەریدەخەن هێرشەکانی ئەمریکا و ئیسرائیل و شەپۆلی تەقینەوەکان، کاریگەرییان لەسەر قەڵای مێژوویی فەلەک ئەفلاک داناوە.
بە گوتەی عەتا حەسەنپوور، دوای بارانبارینی ئەم دواییانە، درز و شکانی زۆر لە بەشە جیاوازەکانی قەڵای فەلەک ئەفلاک دەرکەوتوون و نیگەرانییەکان لەبارەی خۆڕاگریی ئەم شوێنەوارە مێژووییە، زیادیان کردووە.
بەڕێوەبەری گشتیی میراتی کولتووری، گەشتوگوزار و پیشە دەستییەکانی لوڕستان هۆشداری دەدات، قەڵا مێژووییەکە لە بەردەوامیی هێرشەکانی ئەمریکا و ئیسرائیل دا مەترسیی رووخانی لەسەرە.
عەتە حەسەنپوور ئەوەشی خستەڕوو، شارەزایان و سکرتێری گشتیی کۆمیسیۆنی نیشتمانیی یونسکۆ سەردانی قەڵاکەیان کردووە، بۆ خەمڵاندنی وردی زیانەکان.
قەڵای مێژوویی فەلەک ئەفلاک نزیکەی 1800 ساڵ لەمەوپێش لە سەردەمی ساسانییەکاندا دروست کراوە و تاوەکو ئێستا چەندین جار نۆژەن کراوەتەوە.
لە 29 رۆژی جەنگدا، راستەوخۆ هێرشنەکراوەتە سەر فەلەک ئەفلاک، بەڵام بەهۆی بۆردوومانکردنی چەند بنکەیەکی سەربازیی نزیک لە قەڵاکە لە خوڕەمئاوا، زیانی زۆری پێگەیشتووە.