حەوت یاریزانی کورد لە پاڵەوانێتیی بۆکسێنی نەوجەوانانی ئێران پلەی یەکەم و دووەمیان بەدەستهێنا

 

 

لە پاڵەوانێتیی بۆکسێنی نەوجەوانانی ئێراندا کە لە شاری مەلایری پارێزگای هەمەدان بەڕێوەچوو، لە کێشی 46 کیلۆگرام مەهدی روزبەهانی لە لوڕستان و ماهان مستەفایی لە سنە، لە کێشی 48 کیلۆگرام سەهەند نەجەفی لە ورمێ و هیوا نادری لە کرماشان پلەی یەکەم و دووەمیان بەدەستهێنا.

 

هەروەها لە کێشی 50 کیلۆگرام کاوان مەولوودی لە سنە و لە کێشی 57 کیلۆگرامیشدا ئاژوان سالم لە سنە پلەی دووەمیان بەدەستهێنا. محەممەدسەفەر بەیرانوەند، یاریزانی لوڕستانی لە کێشی 60 کیلۆدا پلەی یەکەمی بەدەستهێنا.

 

208 بۆکسێنەر لە 31 پارێزگای ئێران و رۆژهەڵاتی کوردستان لە پاڵەوانێتییەکەدا بەشدار بوون. هیوا نادری لە کێشی 48 کیلۆ پلەی دووەمی بەدەستهێنا و وەکو باشترین یاریزان لەڕووی تەکنیکییەوە دەستنیشان کرا.

 

سوهەیب رەحیمی، راهێنەری بۆکسێن لە جوانڕۆ دەڵێت، "یەکەمجارە لە ناوچەی هەورامان و باکووری رۆژئاوای پارێزگای کرماشان یاریزانێک لە بۆکسێندا لە ئاستی ئێران پلەی دووەم بەدەست بهێنێت." داواش دەکات، شوێنێک بۆ یاری بۆکسێن لە جوانڕۆ بکرێتەوە.