ئاسایشی نیشتمانیی عێراق: لە ساڵێکدا زیاتر لە سێ هەزار تۆمەتبار دەستگیرکراون

 

 

ئەرشەد حاکم، گوتەبێژی دەزگای ئاسایشی نیشتمانیی عێراق، ئەمڕۆ پێنجشەممە، 1ـی کانوونی دووەمی 2026، بە تۆڕی میدیایی رووداوی راگەیاند: "لە ماوەی ساڵی رابردوودا، 434 فەرمانی دەستگیرکردن لە دۆسیەی تیرۆر، 835 فەرمان بۆ بازرگانان و گواستنەوەی ماددەی هۆشبەر و هەزار و 535 فەرمانی دەستگیرکردنیش لە دۆسیەکانی هەڕەشەکردن و دەستبڕیندا جێبەجێ کراون."

 

بە گوتەی ئەرشەد حاکم، دەزگاکەیان 342 تۆمەتباری لە دۆسییەکانی تایبەت بە حیزبی بەعسی قەدەخەکراو و 238 تۆمەتباری دیکەی لە دۆسیەکانی بزووتنەوە تووندڕۆکان دەستگیرکردووە.

 ئەرشەد حاکم، گوتی "ئۆپەراسیۆنی دەستگیرکردنی ئەندامان و ئەو کەسانەی پروپاگەندە بۆ حیزبی بەعس دەکەن، بە بڕیاری دادوەر و لە 14 پارێزگای عێراق جێبەجێ کراوە."

 

سەبارەت بە ماددە هۆشبەرەکان، گوتەبێژی دەزگای ئاسایشی نیشتمانیی عێراق گوتی: "دەست بەسەر 112 کیلۆگرام ماددەی هۆشبەر و 620 هەزار و 893 حەبی هۆشبەردا گیراوە، هەروەها 14 تۆڕی نێودەوڵەتیی بازرگانیکردن بە ماددەی هۆشبەر هەڵوەشێندراونەتەوە."

 

ئەرشەد حاکم، باسی لەوەشکرد کە دەستیان بەسەر 20 بۆمب و پشتێنی بۆمبڕێژکراودا گرتووە و "4760 زانیاریی هەواڵگریی پێشوەختەمان پێشکێش کراوە."

 

گوتەبێژی ئاسایشی نیشتمانیی عێراق دەڵێت، "11 هەزار و 700 ئەکاونت و پەیجی سەرپێچیکار لە تۆڕە کۆمەڵایەتییەکان بە بڕیاری دادگە چارەسەرکراون."