یاریدەدەری وەزیری دەرەوەی ئەمریکا: ئاگاداری رفاندنی رۆژنامەڤانێکی ئەمریکایین لە بەغدا

 

رۆژی سێشەممە، 31ی ئاداری 2026، دیلان جۆنسن، یاریدەدەری وەزیری دەرەوەی ئەمریکا لە ئێکس بڵاویکردەوە، "ئاگاداری رفاندنی رۆژنامەڤانێکی ئەمریکایین لە بەغدا و پێشتر ئەرکی خۆمان بۆ ئاگادارکردنەوەی ئەم کەسە لە هەڕەشەکان جێبەجێ کردبوو". 

 

گوتەکانی جۆنسن لە کاتێکدان ئەمڕۆ شێلی کیتلسن، رۆژنامەڤانی ناسراوی ئەمریکی لە شەقامی سەعدوون-ی ناوەڕاستی بەغدا رفێندرا. وەزارەتی ناوخۆی عێراق دەڵێت، لە ئۆپەراسیۆنێکی راوەدوونان دا یەکێک لە رفێنەرەکان دەستگیرکراوە و گەڕان بۆ دۆزینەوەی رۆژنامەڤانەکە بەردەوامە. 

 

یاریدەدەری وەزارەتی دەرەوەی ئەمریکا نووسیویەتی، "بەردەوامین لە هاوئاهەنگی لەگەڵ FBI بۆ دڵنیابوون لە ئازادکردنی لە زووترین کاتدا و کەسێک کە پەیوەندی بە گرووپی میلیشیای کەتیبەکانی حیزبوڵڵاوە هەیە، لە لایەن دەسەڵاتدارانی عێراقەوە دەستگیرکراوە". 

 

یاریدەدەری وەزیری دەرەوەی ئەمریکا ئاماژەی بەوەش کردووە، "عێراق هێشتا لە ئاستی چوارەمی هۆشداریی گەشتکردندایە و داوا لە ئەمریکییەکان دەکەین بە هیچ هۆکارێک گەشت بۆ ئەو وڵاتە نەکەن"؛ جەختی لەوەش کردەوە، "داوا لە هەموو ئەمریکییەکان و رۆژنامەڤانان دەکەین پابەندی رێنماییەکانی گەشتکردن بن". 

 

رۆژی 28ی شوباتی ئەم ساڵ، ئەمریکا و ئیسرائیل هێرشیانکردە سەر ئێران و دەواتر ئەویش بە مووشەک و درۆن وەڵامی هێرشەکانی دایەوە. وەکو بەشێک لە وەڵامەکەی ئێران هێرشیکردە سەر وڵاتانی کەنداویش. 

 

لە دوو هەفتە پێش دەستپێکی جەنگەکەوە، ئەمریکا هاووڵاتییانی لە گەشتکردن بۆ عێراق و زۆرینەی وڵاتانی رۆژهەڵاتی نێوەڕاست ئاگادارکردبووەوە و داوای لێکردبوون عێراق جێبهێڵن.