وەزارەتى گواستنەوەى عێراق بۆ رووداو: فڕۆکەخانەى بەغدا بە کاتى داخرا

 

 

ئەمڕۆ پێنجشەممە، مەیسەم سافى، گوتەبێژى وەزارەتى گواستنەوەى عێراق بە تۆڕى میدیایی رووداوى راگەیاند، لە کاژێر 6:45ی ئێوارەوە فڕۆکەخانەى بەغدا داخراوە و بۆ ماوەى کاژێرێک داخستنەکە بەردەوام دەبێت. 

 

مەیسەم سافى رایگەیاند: داخستنى فڕۆکەخانەکە بەهۆى خراپى کەشوهەوایە و هاتن و چوون دەگرێتەوە.

 

ئەمڕۆ پێنجشەممە 1ی ئایار شەپۆلیکى خۆڵبارین رووى لە عێراق کردووە و شارەکانى نێوەڕاست و باشوورى گرتووەتەوە.

 

 گوتەبێژى وەزارەتى گواستنەوەى عێراق ئاماژەى بەوەدا کە دواى کاژێرێک لە داخستنى فڕۆکەخانەکە، بەگوێرەى دۆخى کەشوهەوا بڕیار لەبارەى درێژکردنەوەى یان دەستپێکردنەوەى گەشتەکان دەدرێت.

 

مەیسەم سافى گوتى: "ئەو بڕیارە تەنیا فڕۆکەخانەى بەغداى گرتووەتەوە و گەشتکردن بەسەر ئاسمانى عێراق بەردەوامە و رانەگیراوە".