نەوتی عێراق بۆ رووداو: دەست بە جێبەجێکردنی پڕۆژەی بۆریی نەوتی بەسرە - حەدیسە کرا

 

 

هەینی 1ی ئایاری 2026، عەبدولساحب بەزوون، گوتەبێژی وەزارەتی نەوتی عێراق ئەو زانیارییەی بە تۆڕی میدیایی رووداو دا.

 

هێڵەکە درێژییەکەی 700 کیلۆمەترە و تیرەکەی 56 ئینجە. عەبدولساحب بەزوون دەڵێت، "بۆرییەکە بە سێ ئاراستە بۆ هەناردەکردنی نەوت سوودی لێ دەبینرێت، کە بریتین لە بەندەری بانیاسی سووریا، جەیهانی تورکیا و عەقەبەی ئوردن."

 

لە 26ی نیسانى 2026 دەستەیەکى تایبەت بە سەرۆکایەتی یەکێک لە بریکارانی وەزارەتی نەوت پێکهێنرا بۆ بەدواداچوونی جێبەجێکردنی پڕۆژەی بۆریی نەوتی بەسرە – حەدیسە.

 

گوتەبێژی وەزارەتی نەوتی عێراق رایگەیاند: بڕیار دراوە 1.5 ملیار دۆلار بۆ جێبەجێکردنی پڕۆژەکە تەرخان بکرێت و خێرایی جێبەجێکردنی پڕۆژەکە پەیوەستە بە دابینکردنی پارە کە حکومەتی نوێی عێراق لەنێو یاسای بودجەدا رێکارەکانی دابینکردنی پارەکەی لە چوارچێوەى یاساى بودجە دەگرێتەبەر.

 

پڕۆژەکە لە بەسرەوە دەستپێدەکات و دەچێتە شارۆچکەی حەدیسە لە ئەنبار، لەوێشەوە دەتوانرێت لە رێگەیەوە نەوتی بەسرە بگوازرێتەوە بۆ بۆرییەکانی کەرکووک بەرەو بەندەری جەیهانی تورکیا.