لەپێناو مووچەی کۆمەڵایەتی 250,000 کەس لە عێراق ئۆتۆمبێل بەناوی هاوژینەکانیانەوە دەکەن

دەستەی پاراستنی کۆمەڵایەتی سەر بە وەزارەتی کار و کاروباری کۆمەڵایەتی عێراق لە راگەیێندراوێک بڵاویکردەوە 253 هەزار و 4 کەس کە لە مووچەی پاراستنی کۆمەڵایەتی سوومەندن، دەرکەتووە ئۆتۆمبێلیان هەیە و بەناوی هاوژینەکانیان کردووە. 

 

دەستەی پاراستنی کۆمەڵایەتی جەختلەوەدەکاتەوە، وردبینی داتاکان بەردەوامە بۆ رێگری لەو کەسانەی سەرپێچیان کردووەتە سەر هاوکاری کۆمەڵایەتی و بەشێوەیەکی ناسایی مووچە وەردەگرن و بەپێی رێنماییەکان شایستە نین. 

 

دەستەی پاراستنی کۆمەڵایەتی رۆژی چوارشەممە، 31-06-2023 بڵاویکردەوە لەماوەی مانگی ئایاردا هاوکاری 10 هەزار و 217 کەسیان راگرتووە، بەهۆی ئەوەی خاوەن ئۆتۆمبێلی مۆدێل 2016 بە سەرەوە بوون.

  

ئەحمەد ئەسەدی، وەزیری کار و کاروباری کۆمەڵایەتیی عێراق رۆژی 24ی نیسانی 2023 لە راگەیێندراوێکدا بڵاویکردەوە، 163 هەزار سەرپێچیان بۆ سەر تۆڕی پاراستنی کۆمەڵایەتی ئاشکرا کردووە. 

 

ئەمساڵ وەزارەتی کار و کاروباری کۆمەڵایەتی عێراق هەڵمەتێکی  گەورەی لێکۆڵینەوەی کۆمەڵایەتی دەستپێکرد بۆ وردبینی ئەو کەسانەی کە داواکاریان بۆ هاوکاری کۆمەڵایەتی لە رێگەی ئەلیکترۆنییەوە پێشکێشکردووە،  کە نزیکەی دوو ملیۆن و حەوت هەزار خێزان داواکارین. 

 

وەزیری کار و کاروباری کۆمەڵایەتیی عێراق رایگەیاندووە، لە پرۆژەیاسای بودجەدا 600 هەزار خێزان، مووچەی پاراستنی کۆمەڵایەتییان بۆ دابیندەکرێت و 6 ترلیۆن دیناریش بۆ پاراستنی کۆمەڵایەتی و نیڤشکان تەرخانکراوە .  

 

پێشتریش سەنا موسەوی، راوێژکاری سەرۆکوەزیرانی عێراق رایگەیاند، ملیۆنێک و 600 هەزار خێزان لە داتاکانی دەستەی چاودێریی کۆمەڵایەتی تۆمارکراون و مووچە وەردەگرن. بەڵام عەلی حلو، جێگری سەرۆکی دەستەی خاوەن پێداویستییە تایبەتەکان لە وەزارەتی کار و کاروباری  کۆمەڵایەتی عێراق رۆژی 12-05-2023 رایگەیاند، زیاتر لە 5 ملیۆن و 200 هەزار کەس کە دەکاتە نزیکەی  ملیۆنێک و 400 هەزار خێزان لە دەستەی پاراستنی کۆمەڵایەتی سوومەندن.