پەرلەمانی عێراق لیژنەیەکی تایبەت بە سنووری عێراق و کوێت پێکدەهێنێت

 

 

شێروان دووبەردانی، ئەندامی پەرلەمانی عێراق، رۆژی سێشەممە 01-08-2023 بە تۆڕی میدیایی رووداوی راگەیاند، لە کۆبوونەوەی ئەمڕۆی پەرلەمانی عێراقدا کە بە سەرۆکایەتیی موحسین مەندەلاوی، جێگری یەکەمی سەرۆکی پەرلەمان و ئامادەبوونی 176 پەرلەمانتار دەستیپێکرد، بڕیاردرا لیژنەیەکی پەرلەمانی لە لیژنەکانی یاسایی، پەیوەندییەکانی دەرەوە، ئاسایش و بەرگریی پەرلەمانی عێراق بۆ تاوتوێکردنی دۆسیەی سنووری نێوان عێراق و کوێت پێکبهێندرێت و دواتر لەوبارەوە راپۆرتێک پێشکێش بکات.

 

وەکو شێروان دووبەردانی گوتی، لە بەشێکی کۆبوونەوەکەدا کە شاخەوان عەبدوڵڵا، جێگری دووەمی سەرۆکی پەرلەمان سەرۆکایەتیی کۆبوونەوەکەی کرد، داوا لە لیژنەی دارایی پەرلەمانی عێراق کرا روونکردنەوە لەبارەی هۆکارەکانی دابەزینی بەهای دینار بەرامبەر دۆلار و جێبەجێنەکردنی رێنوێنییەکانی یاسای بودجەی فیدراڵی بدات.

 

هەر لە کۆبوونەوەکەدا خوێندنەوە بۆ ژمارەیەک پڕۆژەیاسا کران، وەکو خوێندنەوەی یەکەم بۆ پڕۆژەیاسای هەمواری یەکەمی یاسای دەستبەسەرداگرتنی موڵک و ماڵی گواستراوە و نەگواستراوەی بەرپرسانی دەسەڵاتی پێشوو ژمارە 72ی ساڵی 2017؛ خوێندنەوەی دووەم بۆ پڕۆژە یاسای هەمواری دووەمی یاسای دڵنیایی بەرپرسیاریەتی کەسی فەرمانبەرانی فەرمانگەکانی دەوڵەت و کەرتی گشتی ژمارە 47ی ساڵی 1990؛ خوێندنەوەی دووەم بۆ پڕۆژە یاسای پەیوەندیکردنی عێراق بە پرۆتۆکۆڵی گشیی ساڵی 1997 بۆ هەمواری رێککەوتنی رێگریکردن لە پیسبوون لەلایەن کەشتییەکانەوە ساڵی 1973؛ خوێندنەوەی دووەم بۆ پڕۆژە یاسای پەیوەندیکردنی عێراق بە رێککەوتننامەی مەراکشەوە.

 

لە کۆتایی دانیشتنەکەدا بڕیاردرا کۆبوونەوەی داهاتووی پەرلەمانی عێراق، کاژێر یەکی دوای نیوەڕۆی رۆژی پێنجشەممە بێت.