ناوخۆی عێراق: کردنەوەی سنوور بەڕووی پەنابەرانی سووریادا راست نییە

 

 

شەوی دووشەممە، 2ی شوباتی 2026، وەزارەتی ناوخۆی عێراق لە روونکردنەوەیەکدا رایگەیاند، لە هەندێک پەیج و ئەکاونتی تۆڕە کۆمەڵایەتییەکاندا هەواڵێک بڵاوبووەتەوە کە گوایە "عێراق سنوورەکانی بۆ 350 هەزار پەنابەری سووریی کردووەتەوە."

 

وەزارەتی ناوخۆی  عێراق گوتی، "ئێمە ئەم هەواڵانە بە هەموو شێوەیەک رەتدەکەینەوە." هەروەها داوا لە هاووڵاتییان و دەزگاکانی راگەیاندن دەکات، "وردبن لە گواستنەوەی زانیارییەکان و تەنیا پشت بە سەرچاوە فەرمییەکان ببەستن، نەک بکەونە ژێر کاریگەریی "دەنگۆی بێبنەما."

 

لە بەشێکی دیکەی روونکردنەوەکەدا، وەزارەتی ناوخۆ داوای لە بلۆگەر و بەکارهێنەرانی تۆڕە کۆمەڵایەتییەکان کرد "زانیاریی ناڕاست" بڵاونەکەنەوە.

 

ئەم روونکردنەوەیەی وەزارەتی ناوخۆی عێراق لەکاتێکدایە، بەهۆی ئاڵۆزییەکانی ئەم دواییەی سووریا، دەنگۆی جیاواز لەبارەی هاتنی پەنابەران لەسەر سنوورەکان بڵاودەکرێنەوە.