پیشەسازییەکانی عێراق: هەناردەی ساڵانەمان 300 ملیۆن دۆلارە

 

 

ئەمڕۆ چوارشەممە، 3ی کانوونی یەکەمی 2025، عادل عەگاب، سەرۆکی یەکێتیی پیشەسازییەکانی عێراق بە تۆڕی میدیایی رووداوی راگەیاند، بە کۆی گشتی نزیکەی 67 هەزار کارگە و پڕۆژەی پیشەسازی لە عێراق هەن، بەڵام لەو ژمارەیە ئێستا "زیاتر لە 40 هەزاریان کار دەکەن" و ئەوانی دیکە لەکار کەوتوون.

 

بە گوتەی عادل عەگاب، ئەو پڕۆژانە کاریگەریی راستەوخۆیان لەسەر بازاڕی کار هەبووە و "توانیویانە زیاتر لە ملیۆنێک و 300 هەزار هەلی کار بڕەخسێنن."

 

سەبارەت بەو کاڵایانەی لە عێراقەوە هەناردە دەکرێن، سەرۆکی یەکێتیی پیشەسازییەکان گوتی: "داهاتی ساڵانەی ئەو بەرهەمانە سەرووی 300 ملیۆن دۆلارە."

 

ئەو کاڵایانە پێکدێن لە خواردنەوە گازی و وزەبەخشەکان، شەربەتی سرووشتی و بەرهەمهێنراو، خورما، مرەبا، تەحین، بسکویت، جۆرەکانی بەهارات، چپسی پەتاتە، بۆریی کشتوکاڵی، دەرگا و پەنجەرەی PVC، مافوور، کێبڵی کارەبایی و کاشی مۆزاییک.

 

عادل عەگاب ئاماژەی بەوەشدا، بەپێی ئەو پلانەی داڕێژراوە، دەیانەوێت لە ساڵی 2027 قەبارەی هەناردە بگەیێنینە یەک ملیار دۆلار و لە ساڵی 2028ـیشدا داهاتەکەی بگاتە سەرووی دوو ملیار دۆلار.

 

بۆ گەیشتن بەو ئامانجە، عێراق چاوی لە کانزا سرووشتییەکانی ژێر زەوییە. سەرۆکی یەکێتیی پیشەسازییەکان دەڵێت: "پلانی ئێستامان کارکردنە لەسەر کانزاکانی خاکی وڵاتمان، کە بەدڵنیاییەوە توانای پیشەسازیمان دەگەیێنێتە ئاستێکی زۆر باڵا."

 

 

لمی سیلیکا: لە  دروستکردنی شێوازە جۆراوجۆرەکانی شووشە بەکاردەهێنرێت.

 

فۆسفات: لە  دروستکردنی چەک، پزیشکی، خۆراک، ئالیکی ئاژەڵ و کشتوکاڵدا بەکاردەهێنرێت.

 

بەردی کڵس: لە کەرەستەی بیناسازی، لاستیک، کشتوکاڵ و پاککردنەوەی ئاو بەکاردەهێنرێت.

 

قوڕی کائۆلین: لە دروستکردنی کاخەز، لاستیک، بۆیاخ، پێداویستیی بیناسازی و دەرمان بەکاردەهێنرێت.