ئاوەدانکردنەوە و گەشەپێدان: مالیکی و سوودانی بەربژێری شەرعیی سەرۆکوەزیرانن

 

 

یەکشەممە 4ی کانوونی دووەمی 2026، فیراس مەسلەماوی، گوتەبێژی هاوپەیمانیی ئاوەدانکردنەوە و گەشەپێدان کە محەمەد شیاع سوودانی سەرۆکایەتیی دەکات، بە تۆڕی میدیایی رووداوی گوت: "ئەو بەربژێرانەی کە تاوەکو ئێستا خراونەتەروو بۆ پۆستی سەرۆکوەزیران وەک بەربژێرانێک کە شەرعیەتیان هەبێت، محەممەد شیاع سوودانی و نووری مالیکین، بەوپێیەی بەربژێری فراکسیۆنی سیاسیی دیارن و ئەزموونیان هەیە لە بەڕێوەبردنی دەوڵەتدا و لە چاوەڕوانیی ئەوەدان کە یەکلاکردنەوەی کۆتایی لەسەر بنەمای سازانی ناوخۆیی بێت کە یەکڕیزیی چوارچێوەی هاوئاهەنگی بپارێزێت.

 

لە هەڵبژاردنی پەرلەمانی عێراقدا هاوپەیمانیی ئاوەدانکردنەوە و گەشەپێدان 45 کورسیی بەدەستهێناوە، لیستی دەوڵەتی یاسا بە سەرۆکایەتیی نووری مالیکی 30 کورسیی لە خولی نوێی پەرلەماندا هەیە.

 

فیراس مەسلەماوی رایگەیاند: "گفتوگۆکان لەناو چوارچێوەی هاوئاهەنگی بە رووحێکی ئەرێنی بەردەوامن و دوورن لە گرژیی سیاسی، هاوپەیمانییەتییەکە بڕوای بەوەیە کە ماف بە گەورەترین فراکسیۆن دەدرێت لەناو هەر پێکهاتەیەکی سیاسی بەربژێر بۆ پێگە سەرەکییەکان دیاری بکات، بەوپێیەی ئەو پرسە بەرکەوتەی دەستووری و سیاسییە."

 

یەکلاکردنەوەی بەربژێری پۆستی سەرۆکوەزیران لەلایەن هاوپەیمانیی چوارچێوەی هاوئاهەنگیی شیعە، دەبێت بەر لە دانیشتنی پەرلەمانی عێراق بۆ هەڵبژاردنی سەرۆککۆمار بێت، بەوپێیەی سەرۆککۆماری هەڵبژێردراو بەربژێری گەورەترین فراکسیۆن رادەسپێرێت بۆ پێکهێنانی حکومەتی نوێ.