بە درۆن هێرشکرایە سەر کۆگەکانی کۆمپانیای نەوتی مەیسان

 

ساحب بەزوون، گوتەبێژی وەزارەتی نەوتی عێراق بە رووداوی راگەیاند: "کۆگەکانی کێڵگەی نەوتی بوزورگان رووبەڕووی هێرشێکی درۆنی بووەتەوە، بەڵام سەلامەتیی کارمەندان پارێزراوە."

 

سەرچاوەیەکی ئەمنی لە پارێزگای میسان رایگەیاند، هێرشەکە بە چوار درۆن کراوە.

 

بەگوێرەی لێدوانی سەرچاوە ئەمنییەکە، هێرشەکە کۆمپانیا بیانییەکانی ناو کێڵگەی نەوتیی بوزرگانی کردووەتە ئامانج. راشیگەیاندووە، چوار درۆنەکە لە یەک کاتدا بۆردوومانی ناوچەکەیان کردووە، بەڵام هێرشەکە تەنیا زیانی مادیی لێکەوتووەتەوە و هیچ زیانێکی گیانی یان برینداربوون لە نێو کارمەندانی کۆمپانیاکاندا نەبووە.

 

کۆگەکانی کۆمپانیای نەوتی میسان، لەلایەن کۆمپانیای 'بیکەر هیوز'ی بەریتانی سەرپەرشتیی دەکرێن.

 

 

تاوەکو ئێستا هیچ لایەنێک بەرپرسیارێتی خۆی لە هێرشەکە رانەگەیاندووە و هێزە ئەمنییەکانیش لێکۆڵینەوەیان لە رووداوەکە دەستپێکردووە. 

 

کێڵگەی بوزرگان یەکێکە لە کێڵگە نەوتییە گرنگەکانی باشووری عێراق و چەندین کۆمپانیای بیانی تێیدا کار دەکەن.