لە کەرکووک و پارێزگاکانی عێراق؛ لایەنگرانی سەدر دژی ئەمریکا و ئیسرائیل رژانە سەر شەقام

 

لایەنگرێکی سەدر لە بەغدا، ئاماژەی بە مێژووی پەیوەندییەکانی ئەمریکا لەگەڵ ناوچەکە کرد و گوتی: "ئەمریکا و ئیسرائیل هەرگیز نابنە دۆستی ئێمە، سەیری کوردەکانی سووریا بکەن چۆن خیانەت لە مەزڵووم عەبدی کرا. داواکاریمان ئەوەیە داگیرکەر بچێتە دەر و دەبێ هەموومان بە کورد، عەرەب، سوننە، شیعە، ئێزدی و مەسیحییەوە دژی ئەو دووژمنە هاوبەشە یەکبگرین."

 

 

لە ناحیەی بەرتەلەی سەر بە پارێزگای نەینەوا، خۆپیشاندەران رێگەیەکی سەرەکییان داخست و بە بەرزکردنەوەی ئاڵای عێراق ناڕەزایەتییان دەربڕی.

 

سەید محەممەد، رێکخەری خۆپیشاندانەکە لەوێ بە رووداوی گوت: "خەڵکی نەینەوا بۆ سەرکۆنەکردنی کارەکانی زایۆنی و ئەمریکا رژاونەتە سەر شەقام. رێبەرمان ئاشتی دەوێت و راگرتنی شەڕ داواکاری هەموو شەرەفمەندەکانە."

 

رێکخەرەکەی خۆپیشاندانی بەرتەلە جەختی لەوەش کردەوە کە "ئەو هێرشانەی دەکرێنە سەر هەرێمی کوردستان و عێراق قبووڵکراو نین و هەموو مەرجەعە دینییەکان رەتی دەکەنەوە."

 

 

بەپێی پەیامنێرانی رووداو، لە خۆپیشاندانەکانی ئەمڕۆ، پابەندبوونی خۆپیشاندەران بوو بە رێنماییەکانی موقتەدا سەدر، کە تێیدا جەختی کردبووەوە نابێت جگە لە ئاڵای عێراق، هیچ ئاڵایەکی دیکەی حیزبی و لایەنەکان بەرز بکرێتەوە. پاش کاتژمێرێک لە ئاوابوونی خۆر، بە فەرمانی رێبەری رەوتەکە، خۆپیشاندەران بە هێمنی دەستیان بە کشانەوە کرد و کۆتاییان بە چالاکییەکانیان هێنا.

 

 

موقتەدا سەدر، رێبەری رەوتی نیشتمانیی شیعە، پەیامێکی ئاراستەی خۆپیشاندەران کرد و داوای لێکردن کۆتایی بە گردبوونەوەکانیان بهێنن و بگەڕێنەوە ماڵەکانیان.

 

سەدر لە راگەیێندراوێکدا، سوپاسی لایەنگرانی کرد و رایگەیاند: "ئەی خۆپیشاندەران، سوپاس بۆ ئێوە بۆ ئەو هەڵوێستە شکۆمەندانەیەتان کە دڵی دۆستان خۆش دەکات و دوژمنان تووڕە دەکات."

 

رێبەری رەوتی نیشتمانیی شیعە، لە دوا ساتەکانی خۆپیشاندانەکان گوتی: "لە هەموو پارێزگاکانەوە بە سەلامەتی بگەڕێنەوە، ئەوەی لەسەرتان بوو بە زیادەوە ئەنجامتان دا.. سڵاو بۆ عێراق."