زیاتر لە 11 هەزار کەس لە بەغدا دادەمەزرێن

 

 

عامر داود فەیلی، ئەندامی ئەنجوومەنی پارێزگای بەغدا، ئەمڕۆ یەکشەممە، 4ی ئایاری 2025، بە تۆڕی میدیایی رووداوی راگەیاند: "11 هەزار و 362 کەس دادەمەزرێن؛ بۆ هەریەک لە یەکە کارگێڕییەکانی پارێزگای بەغدا 250 دامەزراندن دەبێت". 

 

دامەزراندنەکە لە چوارچێوەی یاسای بودجەی گشتیی فیدراڵیی سێ ساڵەی عێراق ژمارە 13ـی تایبەت بە ساڵانی 2023، 2024 و 2025ـە کە تێیدا 150 هەزار دامەزراندن بە گرێبەست تەرخانکراوە و بەسەر پارێزگاکان دابەشکراوە.

 

عەبدولموتەلیب عەلەوی، پارێزگاری بەغدا رۆژی 10ی ئاداری 2025 رایگەیاند، 37 هەزار دامەزراندن بە گرێبەست بۆ بەغدا تەرخانکراون و رەزامەندی دراوە 22 هەزاریان بۆ بەری رەسافە بێت؛ نزیکەی 1500 کەسی دیکەش کە زۆربەیان مامۆستان دامەزراون.

 

بەم 11 هەزار و 362 کەسەوە، زیاتر لە دوو هەزار پلەی دیکە دەمێنن.

 

عولا تەمیمی، ئەندامی ئەنجوومەنی پارێزگای بەغدا، ئەمڕۆ یەکشەممە، 4ی ئایاری 2025، بە تۆڕی میدیایی رووداوی راگەیاند: "دامەزراندنەکە بە گرێبەستە بۆ سێ ساڵ بە مووچەی مانگانەی 300 هەزار دینار". 

 

لیژنەیەک لە ئەنجوومەنی پارێزگای بەغدا پێکهێندراوە بۆ ئەوەی بەسەر قەزا و ناحییەکانی بەغدا دابەش بکرێن لەگەڵ رەچاوکردنی چڕی دانیشتووان و رادەی فەرامۆشکردنی ناوچەکە.

 

پێشکێشکردن 20 بۆ 30 رۆژ بەردەوام دەبێت، وەک کارئاسانی بۆ پێشکێشکردن 43 لینکی پێشکێشکردن دەکرێنەوە.